काठमाडौं । नेपाली कांग्रेसको संस्थापन इतर समूहले आगामी २९ साउनमा आयोजना गर्न लागेको राष्ट्रिय भेलाको स्थान तय गरेको छ । इतर समूहले भेलाका लागि काठमाडौंको सुकेधारास्थित मिराकल पार्टी प्यालेस बुक गरेको हो ।
इतर समूहको प्रचार–प्रसार समिति संयोजक मीन विश्वकर्माका अनुसार मिराकल पार्टी प्यालेसमै राष्ट्रिय भेला आयोजना गर्ने निर्णय भएको हो । उनका अनुसार भेलाको उद्घाटन समारोह शुक्रबार दिउँसो १ बजे हुनेछ ।
पूर्वसभापति शेरबहादुर देउवाको प्रमुख आतिथ्यतामा राष्ट्रिय भेला तीन दिनसम्म सञ्चालन हुने बताइएको छ । भेलामा देशभरबाट करिब पाँच हजार नेता तथा कार्यकर्ता सहभागी हुने इतर समूहको दाबी छ ।
कांग्रेस नेता डा. प्रकाशशरण महतका अनुसार पूर्वप्रधानमन्त्री देउवा बिहीबार दिउँसो १२ः३० बजे काठमाडौं आइपुग्नेछन् । उनी थाई एयरको उडानमार्फत स्वदेश फर्किन लागेका हुन् ।
जेनजी आन्दोलनका क्रममा भएको सांघातिक आक्रमणमा घाइते भएपछि देउवा गत १३ फागुनको राति सिंगापुर एयरलाइन्सको उडानबाट उपचारका लागि सिंगापुर गएका थिए । त्यसपछि थप उपचारका लागि उनी ७ चैत २०८२ मा सिंगापुरबाट हङकङ पुगेका थिए ।
