काठमाडौं । श्रम संस्कृति पार्टीका अध्यक्ष हर्क साम्पाङले तराई–मधेशमा विकसित घटनाक्रमका क्रममा गृहमन्त्रीले वार्ता गरेको ‘हिन्दू सम्राट सेना’ को भूमिकामाथि प्रतिनिधिसभामा प्रश्न उठाएका छन्।
मंगलबार प्रतिनिधिसभाको बैठकमा बोल्दै उनले नेपालमा आधिकारिक रूपमा एउटा मात्रै सेना रहेको उल्लेख गर्दै अन्य समूहले ‘सेना’ नाम प्रयोग गर्नुको आधारबारे सरकारसँग जवाफ माग गरे।
उनले भने, “नेपाल सार्वभौम देश हो। यहाँ एउटै मात्रै सेनाको नाम नेपाली सेना हो। त्यसो भए ठाउँ–ठाउँमा सेना गठन गर्ने छुट कसले दिएको हो? सेना गठन गर्न पाउने मापदण्ड के हुन्? ती मापदण्ड पूरा गरेर कसले–कसले सेना गठन गर्न पाउने हो?”
साम्पाङले ‘सेना’ नाम प्रयोग गर्ने यस्ता समूहमाथि प्रतिबन्ध लगाउन सरकारसँग मागसमेत गरे।
उनले आफूहरू जनकपुर जाँदा अवरोध भएको घटनाको पनि चर्चा गर्दै सांसदलाई देशभित्र स्वतन्त्र रूपमा आवतजावत गर्न पाउने संवैधानिक अधिकार सुनिश्चित हुनुपर्ने बताए।
उनले भने, “हाम्रो देश कानुनी राज्य हो भन्ने ठानेको छु। एउटा सांसदले आफ्नै देशमा निर्बाध रूपमा घुमफिर गर्न पाउनुपर्छ। तर जनकपुर जाँदा एउटा समूहले निषेध गर्ने प्रयास गर्यो। यो कस्तो राज्य हो? कानुनी राज्य हो कि जङ्गली राज्य?”
