काठमाडौं । डा. गोविन्द केसीले सरकारसँग पाँचबुँदे सहमति भएपछि आफ्नो अनसन तोडेका छन्।
बिहीबारदेखि धनगढीमा आमरण अनसनमा बसेका डा. केसीसँग वार्ता गर्न सरकारी टोली शनिबार धनगढी पुगेको थियो। वार्तापछि सहमति जुटेपछि उनले गौमुल गाउँपालिका–२, बाजुराका चक्रबहादुर धामीको हातबाट जुस पिएर अनसन अन्त्य गरेका हुन्। धामी धनगढीस्थित अस्पतालमा उपचाररत ८ वर्षीय सुदीप कोइरालाका कुरुवा (भिनाजु) हुन्।
सहमतिअनुसार, शहीद दशरथचन्द स्वास्थ्य विज्ञान विश्वविद्यालय, गेटा अन्तर्गत ३०० शय्याको शिक्षण अस्पताल सञ्चालनका लागि आवश्यक प्रक्रिया तत्काल अघि बढाइने भएको छ। एमबीबीएससहितका शैक्षिक कार्यक्रम सञ्चालन गर्न आवश्यक फ्याकल्टी, जनशक्ति भर्ना, पाठ्यक्रम स्वीकृतिलगायतका तयारी पनि शीघ्र पूरा गरिने सहमतिमा उल्लेख छ।
यस्तै, अस्पताल सञ्चालनका लागि आवश्यक जनशक्ति व्यवस्थापन, उपकरण खरिद तथा अन्य पूर्वाधारको काम तत्काल अघि बढाइनेछ।
सहमतिमा विश्वविद्यालयसम्बन्धी कानुनी व्यवस्था संशोधनको विषय पनि समेटिएको छ। शहीद दशरथचन्द स्वास्थ्य विज्ञान विश्वविद्यालय ऐन, २०८२ मा पदाधिकारीको योग्यता, नियुक्तिलगायतका विषय संशोधन गर्न आवश्यक प्रस्ताव संघीय संसद्को चालु अधिवेशनभित्रै, अर्थात् तीन महिनाभित्र, पेश गरिने उल्लेख गरिएको छ।
त्यसैगरी, राष्ट्रिय चिकित्सा शिक्षा ऐन, २०७५ को दफा ४७ अनुसार चिकित्सा शिक्षण संस्थालाई क्रमशः गैरनाफामूलक र सेवामूलक संस्थाका रूपमा सञ्चालन गर्ने प्रावधान कार्यान्वयनबारे अध्ययन गर्न शिक्षा तथा खेलकुद मन्त्रालयले उच्चस्तरीय कार्यदल गठन गर्ने प्रस्ताव सरकारसमक्ष पेश गर्ने सहमति भएको छ। उक्त कार्यदलले छ महिनाभित्र राय–सुझावसहितको प्रतिवेदन बुझाउनेछ।
