काठमाडौं । पूर्वराष्ट्रपति डा. रामवरण यादवले लोकतन्त्रको मर्म र संविधानको भावना नबुझ्ने व्यक्तिहरू शासनसत्तामा रहेको टिप्पणी गरेका छन् ।
बुधबार काठमाडौंमा आयोजित ‘चक्रप्रसाद बाँस्तोला : बौद्धिकता र विद्रोह’ पुस्तक विमोचन समारोहलाई सम्बोधन गर्दै यादवले संघीयताविरुद्ध सार्वजनिक रूपमा आउने अभिव्यक्तिप्रति आपत्ति जनाउँदै त्यसले मुलुकलाई पछाडि धकेल्ने खतरा रहेको बताए ।
अर्थमन्त्रीले संघीयता खारेज गर्नुपर्ने आशयका अभिव्यक्ति दिँदै आएको उल्लेख गर्दै उनले त्यस्ता धारणा संघीय लोकतान्त्रिक व्यवस्थामाथिको चुनौती भएको बताए । अन्तर्राष्ट्रिय संस्थामा काम गरेको अनुभव र उच्च शिक्षा हासिल गरेका व्यक्तिहरूबाटै संघीयताविरोधी विचार आउनु दुर्भाग्यपूर्ण भएको उनको भनाइ थियो ।
यादवले संघीयता संविधानले संस्थागत गरेको व्यवस्था भएकाले त्यसलाई कमजोर बनाउने प्रयासले लोकतान्त्रिक उपलब्धिमाथि नै प्रश्न उठाउने बताए । प्राप्त राजनीतिक उपलब्धिको संरक्षण गर्दै संविधानको मर्मअनुसार अघि बढ्नुको विकल्प नरहेको उनको धारणा थियो ।
उनले भने, “अहिलेको शासन व्यवस्थामा लोकतन्त्रको मर्म नबुझ्ने मानिसहरू छन् । अर्थमन्त्रीले संघीयता खत्तम गर् भनेर बोल्छन् । यसले फेरि प्यान्डोरा बक्स खोलेर राणाकालीन सोच फर्काउने, देशलाई बर्बाद गर्ने खतरा देखिन्छ ।”
