काठमाडौँ । सभामुख डोलप्रसाद अर्यालले प्रतिनिधि सभाको ‘आकस्मिक समय’ सम्बन्धी व्यवस्थालाई आगामी दिनमा थप व्यवस्थित बनाउने बताएका छन्।
प्रतिनिधि सभाको बिहीबारको बैठकमा समसामयिक विषयमा केही सांसदले धारणा राखिसकेपछि शून्य समय प्रारम्भ गर्ने तयारी भइरहेका बेला थप सदस्यहरू बोल्नका लागि उठेका थिए। त्यस क्रममा सभामुख अर्यालले सांसदहरूलाई बस्न आग्रह गर्दै आकस्मिक समयको अभ्यासबारे स्पष्ट पारे।
उनले आकस्मिक समय अघिल्लो बैठक समाप्त भएयता हालको बैठकसम्मको अवधिमा सार्वजनिक जीवनसँग प्रत्यक्ष सम्बन्धित र अत्यन्त महत्वपूर्ण घटनाक्रममा धारणा राख्न प्रयोग गरिने संसदीय अभ्यास भएको उल्लेख गरे।
सभामुख अर्यालका अनुसार सांसदहरूले समय मागेका विषय संवेदनशील वा आवश्यक नठहरिएमा सभामुखले बोल्ने अवसर नदिन सक्ने व्यवस्था पनि संसदीय प्रक्रियाभित्र पर्छ।
बैठकका क्रममा राजेन्द्रकुमार राई र बलावती शर्मा लगायतका सदस्यहरूले बोल्न आग्रह गर्दै उभिएपछि सभामुखले निर्धारित सूचीभन्दा बाहिरका केही सांसदलाई पनि आकस्मिक समयमा धारणा राख्ने अवसर दिएका थिए।
संसद्मा आकस्मिक समय, शून्य समय तथा विशेष समयमार्फत समसामयिक विषयमा सरकार र सदनको ध्यानाकर्षण गराउने अभ्यास रहँदै आएको छ।
