काठमाडौँ। गृहमन्त्री सुधन गुरुङ र नेपालका लागि स्विट्जरल्यान्डका राजदूत ड्यानियल मेउलीबीच बुधबार गृह मन्त्रालयमा शिष्टाचार भेटवार्ता सम्पन्न भएको छ।
भेटका क्रममा राजदूत मेउलीले गृहमन्त्री गुरुङलाई पदमा नियुक्ति भएकोमा बधाई दिँदै सफल कार्यकालको शुभकामना व्यक्त गरिन्।
भेटवार्तामा गृहमन्त्री गुरुङले नेपाली उच्च पदस्थ व्यक्तिहरूले भ्रष्टाचार वा अन्य गैरकानुनी माध्यमबाट स्विस बैंकमा जम्मा गरेका रकमको खोजी तथा आवश्यक परे फिर्ता ल्याउन दुई देशबीच सहकार्य आवश्यक रहेको बताए। उनले यस्तो रकम फेला परेमा नेपाल सरकारको अनुरोधमा फिर्ता ल्याउने पहल गर्न राजदूतसँग आग्रह गरे।
जवाफमा राजदूत मेउलीले दुई सरकारबीच आप्रवासनसम्बन्धी सहकार्यका विषयहरूमा छलफल भइरहेको जानकारी गराइन्।
यसैगरी, उनले विपद् व्यवस्थापन र जलवायु परिवर्तनका क्षेत्रमा गृहमन्त्री गुरुङको अनुभव र योगदानको सम्मान गर्दै नेपालमा पूर्वसूचना प्रणालीलाई थप सुदृढ बनाउन स्विस सरकारले आवश्यक सहयोग प्रदान गर्न प्रतिबद्ध रहेको बताए।
भेटको अन्त्यमा गृहमन्त्री गुरुङ र राजदूत मेउलीले नेपाल र स्विट्जरल्यान्डबीच ऐतिहासिक सम्बन्धलाई अझ सुमधुर र सुदृढ बनाउन तथा दुई देशबीच थप सहयोग प्रवर्द्धन गर्न तत्पर रहेको धारणा साझा गरेका थिए।
