लमजुङ। दसैँको लामो बिदा पारिवारिक भेटघाटसँगै घुमफिर र नयाँ ठाउँको अनुभव गर्ने अवसर पनि हो। हिमाल, पहाड, प्रकृति, संस्कृति, इतिहास र धार्मिक सम्पदाले समृद्ध लमजुङमा छोटो तथा लामो दूरीका यात्राका लागि विभिन्न आकर्षक गन्तव्य छन्।
दसैँ बिदामा लमजुङ पुग्ने पर्यटकले जिल्लाका ऐतिहासिक, धार्मिक, सांस्कृतिक तथा प्राकृतिकस्थलको भ्रमण गर्न सक्छन्। जिल्लाका प्रमुख १० गन्तव्य यसप्रकार छन् :
१. गाउँसहर–लमजुङ दरबार, बेँसीसहर नगरपालिका–३
लमजुङको इतिहास र शाहवंशीय राज्यसँग जोडिएको गाउँसहर जिल्लाको प्रमुख ऐतिहासिक गन्तव्य हो। यहाँ गाउँसहर दरबार, लमजुङ कालिका मन्दिर तथा यशोब्रह्म शाहसँग सम्बन्धित ऐतिहासिक संरचना छन्। शाहवंशीय राज्यको उद्गमस्थलका रूपमा समेत परिचित गाउँसहर दसैँका बेला धार्मिक तथा ऐतिहासिक दृष्टिले विशेष महत्त्व राख्छ।
२. तुर्लुङकोट कालिका, सुन्दरबजार नगरपालिका–११
प्राचीन इतिहास र धार्मिक आस्थासँग जोडिएको तुर्लुङकोटमा कालिका मन्दिरसहित विभिन्न ऐतिहासिक स्थल छन्। धार्मिक वातावरणसँगै पहाडी भूभागको मनोरम दृश्य अवलोकन गर्न सकिने भएकाले यो दसैँ बिदाका लागि उपयुक्त गन्तव्य हो।
३. पुरानकोट गढी, बेँसीसहर नगरपालिका–४
ऐतिहासिक तथा सामरिक महत्त्व बोकेको पुरानकोट गढी लमजुङको पुरानो राज्य इतिहाससँग जोडिएको स्थल हो। गढी क्षेत्रबाट आसपासका पहाडी भूभागको दृश्यावलोकनसमेत गर्न सकिन्छ।
४. काउलेपानी, बेँसीसहर नगरपालिका–३
मौलिक गाउँबस्ती, होमस्टे, धार्मिकस्थल र प्राकृतिक सौन्दर्य काउलेपानीका मुख्य आकर्षण हुन्। गाउँसहर दरबारसँगै भ्रमण गर्न सकिने भएकाले काउलेपानीको यात्रा इतिहास र ग्रामीण पर्यटनसँग जोड्न सकिन्छ।
५. राइनासकोट, राइनास नगरपालिका–९
ऐतिहासिक, धार्मिक तथा प्राकृतिक महत्त्व बोकेको राइनासकोट लमजुङको आकर्षक पहाडी गन्तव्य हो। यहाँबाट सूर्योदय, सूर्यास्त तथा आसपासका पहाडी भूभागको मनोरम दृश्य अवलोकन गर्न सकिन्छ।
६. घलेगाउँ, क्व्होलासोथार गाउँपालिका–३
गुरुङ संस्कृति, परम्परागत बस्ती, होमस्टे, स्थानीय परिकार र हिमाली दृश्य घलेगाउँका प्रमुख आकर्षण हुन्। घले राजाको इतिहास, गुरुङ सङ्ग्रहालय, मन्दिर तथा सांस्कृतिक सम्पदाले घलेगाउँलाई ग्रामीण तथा सांस्कृतिक पर्यटनको महत्त्वपूर्ण गन्तव्य बनाएको छ।
७. भुजुङ, क्व्होलासोथार गाउँपालिका–४
मौलिक गुरुङ बस्ती, परम्परागत जीवनशैली, स्थानीय संस्कृति र प्राकृतिक सौन्दर्य भुजुङका विशेषता हुन्। होमस्टेमा बसेर गाउँले जीवनशैली र गुरुङ संस्कृतिलाई नजिकबाट अनुभव गर्न सकिन्छ।
८. घनपोखरा, मस्र्याङ्दी गाउँपालिका–१ र २
हिमाली दृश्य, गुरुङ संस्कृति, ग्रामीण जीवनशैली र प्राकृतिक सौन्दर्यले घनपोखरालाई आकर्षक बनाएको छ। घलेगाउँसँगै जोडेर भ्रमण गर्न सकिने भएकाले प्रकृति र संस्कृतिको अनुभव गर्न चाहनेका लागि यो उपयुक्त गन्तव्य हो।
९. करापुटार–इशानेश्वर महादेव, मध्यनेपाल नगरपालिका–७
करापुटार लमजुङको महत्त्वपूर्ण धार्मिक गन्तव्य हो। यहाँ रहेको इशानेश्वर महादेव मन्दिर धार्मिक आस्था र सांस्कृतिक महत्त्वका कारण चर्चित छ। दसैँ बिदामा दर्शन तथा भ्रमणका लागि यो उपयुक्त स्थल मानिन्छ।
१०. इलमपोखरी, दूधपोखरी गाउँपालिका
प्राकृतिक तथा धार्मिक महत्त्व बोकेको इलमपोखरी ग्रामीण पर्यटनको आकर्षक गन्तव्य हो। पोखरी र आसपासको मौलिक प्राकृतिक वातावरणले शान्त तथा रमणीय स्थान खोज्ने पर्यटकलाई आकर्षित गर्छ।
लमजुङका यी गन्तव्यले एउटै जिल्लाभित्र इतिहास, धर्म, संस्कृति, प्रकृति र ग्रामीण जीवनशैलीको विविध अनुभव प्रदान गर्छन्। त्यसैले दसैँको लामो बिदामा परिवार तथा साथीभाइसँग घुमफिर गर्न लमजुङ आकर्षक विकल्प बन्न सक्छ।
–रासस
