काठमाडौं। देशभर सम्पन्न भएको प्रतिनिधिसभा सदस्य निर्वाचनको मतदान समग्रमा शान्तिपूर्ण वातावरणमा सम्पन्न भएको छ। केही स्थानमा सामान्य विवाद देखिए पनि ती समस्या तत्काल समाधान गरी मतदान प्रक्रिया निरन्तर अघि बढाइएको थियो।
निर्वाचन आयोगले तोकेको समयअनुसार बिहान ७ बजेदेखि सुरु भएको मतदान साँझ ५ बजेसम्म सञ्चालन भएको हो। आयोगकी आयुक्त डा. जानकीकुमारी तुलाधरका अनुसार ५ बजेसम्म मतदान केन्द्रमा लाइनमा बसेका मतदातालाई भने त्यसपछि पनि मतदान गर्न दिइने व्यवस्था गरिएको थियो।
आयोगले दिएको जानकारीअनुसार हालसम्म कुनै पनि मतदान केन्द्रमा औपचारिक रूपमा मतदान स्थगित भएको छैन। दोलखा, सर्लाही र रौतहटमा केहीबेर विवाद उत्पन्न भए पनि वार्तामार्फत समाधान गरी पुनः मतदान सुरु गरिएको थियो। दोलखाको तामाकोशी–४ अन्तर्गत पर्ने मालु मतदानस्थलमा केही समय रोकिएको मतदान पछि फेरि सञ्चालनमा आएको थियो।
निर्वाचन आयोगले मतदानको विस्तृत विवरण सार्वजनिक गर्न साँझ ६ः१५ बजे पत्रकार सम्मेलन आयोजना गर्ने जनाएको छ।
यसपटकको प्रतिनिधिसभा निर्वाचनमा प्रत्यक्षतर्फ ६५ राजनीतिक दलले ६१ वटा चुनाव चिह्नसहित प्रतिस्पर्धा गरेका छन्। प्रत्यक्ष प्रणालीमा तीन हजार ४०६ उम्मेदवार चुनावी मैदानमा उत्रिएका छन्, जसमा तीन हजार १७ पुरुष, ३८८ महिला र एक जना अन्य उम्मेदवार रहेका छन्। समानुपातिक प्रणालीतर्फ भने तीन हजार १३५ उम्मेदवार सहभागी छन्, जसमा एक हजार ३६३ पुरुष र एक हजार ७७२ महिला रहेका छन्।
प्रत्यक्ष प्रणालीअन्तर्गत १६५ निर्वाचन क्षेत्र तथा समानुपातिकतर्फ ११० सिटका लागि मतदान भएको हो।
निर्वाचनमा एक करोड ८९ लाख तीन हजार ६८९ मतदाता दर्ता भएका थिए। यसमध्ये ९६ लाख ६३ हजार ३५८ पुरुष, ९२ लाख ४० हजार १३१ महिला र २०० अन्य मतदाता रहेका छन्। साथै एक लाख ८६ हजार १४२ अस्थायी मतदाता पनि कायम गरिएको थियो।
देशभर १० हजार ९६७ मतदानस्थलमा २३ हजार ११२ मतदान केन्द्र स्थापना गरिएको थियो भने १४३ अस्थायी मतदानस्थल पनि तोकिएका थिए। ज्येष्ठ नागरिक, अपाङ्गता भएका व्यक्ति, गर्भवती महिला तथा अशक्त व्यक्तिलाई मतदानमा सहजता प्रदान गर्न विशेष प्राथमिकताको व्यवस्था गरिएको थियो।
निर्वाचनलाई सुरक्षित र व्यवस्थित बनाउन ठूलो संख्यामा सुरक्षाकर्मी परिचालन गरिएको थियो। जसअनुसार ७९ हजार ७२७ नेपाली सेना, ७५ हजार ७९७ नेपाल प्रहरी, ३४ हजार ५६७ सशस्त्र प्रहरी बल, एक हजार ९२१ राष्ट्रिय अनुसन्धानका कर्मचारी र एक लाख ४९ हजार ९० निर्वाचन प्रहरी खटिएका थिए।
