काठमाडौं- सर्लाही–४ मा प्रतिनिधिसभा निर्वाचन नजिकिँदै जाँदा राजनीतिक तापक्रम उच्च बन्दै गएको छ। यसैबीच राष्ट्रिय स्वतन्त्र पार्टी (रास्वपा) का उम्मेदवार डा. अमरेशकुमार सिंह हारको त्रासमा आक्रामक रणनीतिमा उत्रिएका छन्। स्थानीय जनप्रतिनिधिलाई फोनमार्फत् धम्क्याउनेदेखि मतदातालाई आर्थिक प्रलोभन दिने गतिविधिमा उनी संलग्न रहेका छन्।
उक्त क्षेत्रमा नेपाली काँग्रेसका सभापति गगन थापा उम्मेदवार रहेका छन्। २०७९ को निर्वाचनमा बागी उम्मेदवारका रूपमा विजयी भएका सिंह यसपटक राष्ट्रिय स्वतन्त्र पार्टी बाट प्रतिस्पर्धामा छन्। पार्टीका सभापति रवि लामिछाने नेतृत्वको दलबाट उम्मेदवारी दिएका सिंहले जसरी पनि चुनाव जित्नुपर्ने भन्दै धम्क्याइरहेका छन्।
मेयरलाई फोन, ‘हस्तक्षेप नगर्न’ चेतावनी
कौडेना गाउँपालिकाका अध्यक्ष रुपेश यादव (बब्लु) लाई सिंहले फोन गरेर आफ्नो क्षेत्रमा हस्तक्षेप नगर्न सचेत गराएको स्रोतको दाबी छ। यादव काँग्रेसबाट निर्वाचित जनप्रतिनिधि हुन्। उनी क्षेत्र नम्बर २ का भए पनि क्षेत्र नम्बर ४ मा काँग्रेस उम्मेदवार थापाको पक्षमा भोट माग्दै हिँडेका थिए।
स्रोतका अनुसार फोन संवादमा सिंहले काँग्रेसले बढीमा ३० देखि ४० सिट मात्र जित्ने दाबी गर्दै रास्वपाको सरकार बनेपछि संरक्षण गर्ने आफू भएकोसम्म बताएका थिए। “पारिवारिक सम्बन्ध हुँदाहुँदै आफ्नै विरोधमा लाग्नु ठीक होइन,” धम्की दिएका छन्।
यादवले भने जवाफमा आफू जीवनभर काँग्रेसमै रहने अडान दोहोर्याएका छन्। “मर्दा पनि काँग्रेसकै झण्डा ओढ्ने हो, मलाई कसैको संरक्षण चाहिँदैन,” भन्दै उनले कडा प्रतिवाद गरेका थिए।
चुनावी सभाहरूमा सिंहले आफू नजिते ‘नराम्रो परिणाम’ आउने सन्देश दिने गरेका छन्।
पैसाको ‘माल’ बाँडिएको भिडियो सार्वजनिक
यसैबीच सामाजिक सञ्जालमा सार्वजनिक केही भिडियोले सर्लाही–४ को चुनावी प्रतिस्पर्धालाई थप विवादित बनाएको छ। भिडियोमा देखिएका एक मतदाताले रास्वपाबाट ‘माल’ पाएको भन्दै पाँच सय रुपैयाँ लिएको स्वीकार गरेका छन्। “घण्टी छापमा भोट हाल्ने,” भन्ने प्रश्नमा उनले “माल दिएको छ, पाँच सय,” भन्ने जवाफ दिएका छन्।
अर्को भिडियोमा विष्णु नाम गरेका एक ज्येष्ठ नागरिकले पनि पाँच सय रुपैयाँ देखाउँदै रास्वपाबाट पाएको बताएका छन्। ती भिडियोहरूको प्रामाणिकताबारे आधिकारिक पुष्टि भने भएको छैन। केही भिडियो सम्पादित हुन सक्ने दाबीसमेत गरिएको छ।
‘मासुभात’ राजनीति उल्टै आफ्नै काँधमा ?
‘जान्नेलाई छान्ने’ नारासहित उदाएको रास्वपाले विगतमा पुराना दलहरूमाथि ‘मासुभात राजनीति’को आरोप लगाउँदै आएको थियो। तर अहिले त्यही प्रवृत्तिमा आफ्नै उम्मेदवार मुछिएको आरोप लाग्नुले राजनीतिक बहसलाई नयाँ मोड दिएको छ।
निर्वाचनको मिति नजिकिँदै गर्दा भोजभतेर, मदिरा वितरण र नगद प्रलोभनजस्ता गतिविधिका तस्बिर तथा भिडियो सामाजिक सञ्जालमा व्यापक देखिन थालेका छन्। सुरक्षा स्रोतका अनुसार मतदानअगावै अप्रिय घटना गराउने तयारीबारे विशेष सूचना प्राप्त भएपछि निगरानी कडा पारिएको छ।
