काठमाडौँ । तनहुँको आँबुखैरेनी गाउँपालिका-१ यान्चोकका महिलाहरूले सयपत्री फूल खेती विस्तार गरेका छन् । यहाँका महिला विगत तीन वर्षदेखि सयपत्री फूल खेतीमा रमाइरहेका छन् ।
पहिलो वर्ष २२ रोपनी क्षेत्रफलमा सयपत्री फूल खेती गरेका महिलाले दोस्रो वर्ष ४० रोपनी क्षेत्रफलमा फूल खेती गरेका थिए । यस वर्ष त्यसलाई विस्तार गरी ५० रोपनी क्षेत्रफल पुर्याएको यान्चोकटार महिला लघु उद्यमी समूहका अध्यक्ष सुन्तली गुरुङले जानकारी दिइन् । समूहमा आबद्ध महिला सयपत्री फूल खेतीतर्फ आकर्षित भएको उनले बताइन् ।
बजारको समस्या नहुने भएपछि समूहमा आबद्ध महिला व्यावसायिक रूपमा फूल खेतीमा लागिरहेको उहाँको भनाइ छ । गाउँपालिकाले उत्पादित फूलको बजारीकरणमा सघाउँदै आएकाले सहज भएको उनले उल्लेख गरिन् । तिहार नजिकिँदै गरेकाले उत्पादित फूल टिप्न सुरु गरिएको उनले जानकारी दिइन् ।
समूहमा आबद्ध ७० महिलाले सयपत्रीको फूल खेती गरिरहेका छन् । गुरुङले भनिन्, “चाडपर्वलगायत अन्य कार्यक्रमका लागि सयपत्री बाहिरबाट ल्याउन नपरोस् भनेर पालिकाले फूल खेती गर्ने अभियान सुरु गरेको हो ।”
गाउँपालिकाले समूहमा आबद्ध महिलालाई फूल खेतीका लागि आवश्यक सीपसमेत सिकाएको गाउँपालिकाका कृषि शाखा प्रमुख सन्तोष केसीले जानकारी दिइन्। उनले भनिन्, “फूल खेती गर्ने तरिका, टिप्ने तरिकासँगै माला बनाउने सीप पनि महिलाहरूलाई प्रदान गरिएको छ ।”
आँबुखैरेनी गाउँपालिकाका अध्यक्ष शुक्र चुमानले सयपत्री फूल खेतीले महिलालाई आत्मनिर्भर बन्न सहयोग पुगेको बताए ।
