भक्तपुर । नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले समाजमा सांस्कृतिक र नैतिक चेतना कमजोर हुँदा राजनीति पनि खलबलिएको टिप्पणी गरेका छन् ।
सोमबार भक्तपुरमा एमाले जिल्ला कमिटीले बडादसैँ, दीपावली, नेपाल संवत् ११४७ तथा छठ पर्वका अवसरमा आयोजना गरेको चियापान तथा शुभकामना आदानप्रदान कार्यक्रममा बोल्दै उनले समाजमा परोपकार, करुणा र निर्माणको भावनाभन्दा विध्वंस तथा स्वार्थको प्रवृत्ति बढ्दै गएको बताए ।
संसद् भवन निर्माण गर्नुभन्दा आगो लगाउने र सार्वजनिक सम्पत्तिको संरक्षण गर्नुको सट्टा तोडफोड तथा आगजनी गर्ने प्रवृत्ति बढेको भन्दै उनले चिन्ता व्यक्त गरे । आफू नेतृत्वको सरकारले सभा हल, रङ्गशाला र विभिन्न पूर्वाधार निर्माणलाई प्राथमिकता दिएको उल्लेख गर्दै उनले गोदावरीमा अन्तर्राष्ट्रियस्तरको सभागृह निर्माण गरिएको बताए ।
भक्तपुरमा पनि ठूला सार्वजनिक तथा सामुदायिक सभा हलको आवश्यकता रहेको उनको भनाइ थियो । सामान्य कार्यक्रम आयोजना गर्नसमेत पार्टी प्यालेसमा निर्भर हुनुपर्ने अवस्था अन्त्य गर्न सार्वजनिक सभा हल निर्माणमा ध्यान दिनुपर्ने उनले बताए ।
भूकम्पबाट क्षति पुगेका संरचनालाई थप बलियो र व्यवस्थित रूपमा पुनर्निर्माण गरिएको उल्लेख गर्दै उनले दशरथ रङ्गशाला, पोखरा रङ्गशालालगायतका खेल पूर्वाधार निर्माणलाई विकासका उदाहरणका रूपमा प्रस्तुत गरे ।
भाटभटेनीका २१ वटा स्टोरमा भएको लुटपाट र आगजनीको प्रसङ्ग उल्लेख गर्दै ओलीले सार्वजनिक तथा निजी सम्पत्तिमा तोडफोड, आगजनी र लुटपाट गर्ने प्रवृत्तिले समाज र देशको प्रतिष्ठामा क्षति पुर्याएको बताए । यस्ता गतिविधिमा संलग्न व्यक्तिहरू नेपाली समाजकै लागि कलङ्क भएको उनको टिप्पणी थियो ।
उनले विनाशभन्दा निर्माण, घृणाभन्दा करुणा र हिंसाभन्दा सहकार्यको संस्कार विकास गर्नुपर्नेमा जोड दिए । संस्कृति संरक्षण चाडपर्व मनाउनमा मात्र सीमित नभई व्यवहारमा नैतिकता, सद्भाव र जिम्मेवारी कायम गर्नु पनि भएको उनको भनाइ थियो ।
