काठमाडौं । राष्ट्रिय प्रजातन्त्र पार्टी (राप्रपा) की प्रमुख सचेतक खुश्बु ओलीले निर्वाचन प्रहरीको पोशाक खरिदसम्बन्धी अध्ययन प्रतिवेदन आउनुअघि नै सरकारले प्रहरी महानिरीक्षक (आईजीपी) दानबहादुर कार्कीलाई पदबाट हटाउने निर्णय गर्छ भन्ने आफूलाई नलागेको बताएकी छन्।
सार्वजनिक लेखा समिति अन्तर्गतको निर्वाचन प्रहरीको पोशाक खरिदसम्बन्धी अध्ययन उपसमितिको बैठकपछि सञ्चारकर्मीसँग कुरा गर्दै उनले सरकारले आफैँ गठन गरेको उपसमितिको अध्ययनमा हस्तक्षेप गरेर निर्णय लिने विश्वास आफूलाई नभएको बताइन्।
उनले सञ्चारमाध्यममा प्रकाशित समाचार र उपसमितिको बैठकबीच कुनै सम्बन्ध नरहेको पनि दाबी गरिन्। बैठक पूर्वनिर्धारित कार्यक्रमअनुसार बसेको र समाचार प्रकाशित भएकै समयमा बैठक परे पनि त्यसलाई जोडेर हेर्न नहुने उनको भनाइ थियो।
‘मलाई जहाँसम्म लाग्छ, सरकारले त्यसरी हस्तक्षेप गर्ने गरी कुनै पनि निर्णय गर्छ जस्तो मलाई लाग्दैन,’ उनले भनिन्।
ओलीले अध्ययन अनुसन्धान पूरा नहुँदै निष्कर्षमा पुग्नु न्यायसंगत नहुने बताइन्। उपसमितिले कुनै व्यक्ति वा पक्षलाई दोषी ठहर गर्ने वा उन्मुक्ति दिने पूर्वधारणा नराखी निष्पक्ष अध्ययन गर्ने र तथ्य तथा प्रमाणका आधारमा प्रतिवेदन तयार गर्ने उनले बताइन्।
अध्ययन प्रारम्भिक चरणमै रहेकाले दसैँका कारण लामो समय बित्दा अपेक्षित प्रगति हुन नसकेको उनको भनाइ छ। यद्यपि, उपसमितिका सदस्यले व्यक्तिगत रूपमा अध्ययन जारी राखेको उनले बताइन्।
