काठमाडौं । साउदी अरबको सेवा आयल फिल्डमा भएको ड्रोन आक्रमणका क्रममा भग्नावशेष खस्दा एक नेपाली नागरिकको मृत्यु भएको घटनाप्रति नेपाली कांग्रेसले दुःख व्यक्त गर्दै विदेशमा कार्यरत नेपालीको सुरक्षा सुनिश्चित गर्न सरकारसँग आग्रह गरेको छ।
कांग्रेसले बुधबार विज्ञप्ति जारी गर्दै घटनामा ज्यान गुमाएका नेपालीप्रति श्रद्धाञ्जली व्यक्त गरेको छ। पार्टीले नेपाल प्रत्यक्ष रूपमा संलग्न नरहेको द्वन्द्वमा नेपाली नागरिकले ज्यान गुमाउनुपर्ने अवस्था दुःखद र चिन्ताजनक भएको जनाएको छ।
कांग्रेस सभापति गगनकुमार थापाले साउदी अरबमा कार्यरत नेपालीको सुरक्षाका लागि थप प्रभावकारी पहल गर्न, सम्भावित जोखिमप्रति उच्च सतर्कता अपनाउन र आवश्यक परे नेपाली नागरिकको उद्धारको व्यवस्था गर्न सरकारको ध्यानाकर्षण गराएका छन्।
पार्टीले घटनालाई मानवता र मानवीय मूल्यविपरीत भन्दै यस्ता हिंसात्मक घटनाको निन्दा गरेको छ। साथै, मृतकका परिवारप्रति समवेदना व्यक्त गर्दै शोक सहन गर्ने शक्ति मिलोस् भन्ने कामना गरेको छ।
कांग्रेसका कार्यवाहक मुख्यसचिव कृष्णप्रसाद दुलालद्वारा जारी विज्ञप्तिमा विदेशमा कार्यरत नेपाली नागरिकको सुरक्षालाई गम्भीरतापूर्वक लिन सरकारसँग आग्रह गरिएको छ।
