काठमाडौं । नेपाली कम्युनिस्ट पार्टीका नेता राजेन्द्र पाण्डेले पुराना राजनीतिक दलका सबै नेता भ्रष्टाचारी थिए भन्ने भाष्य निर्माण गर्न खोजिएको भन्दै आपत्ति जनाएका छन्। उनले विगत ३५ वर्षमा मुलुकमा केही पनि भएन भन्ने भाष्यसमेत गलत र तथ्यहीन रहेको बताएका छन्।
सोमबार काठमाडौंमा महेन्द्रप्रकाश शिवाकोटीद्वारा लिखित ‘देश विकासको प्रस्तावना’ र ‘राजनीतिक चेतना’ पुस्तक विमोचन कार्यक्रममा बोल्दै पाण्डेले पुराना दलका सबै नेता तथा कार्यकर्ता गलत थिए भन्ने निष्कर्ष निकाल्नु उचित नहुने बताए।
२०४८ देखि २०७९ सालसम्म लगातार सांसद रहेको उल्लेख गर्दै उनले आफू भ्रष्टाचारजन्य गतिविधिमा संलग्न नभएको दाबी गरे। पुराना दलमा रहँदा खराब र राष्ट्रिय स्वतन्त्र पार्टी (रास्वपा) मा प्रवेश गरेपछि असल ठहर गर्ने प्रवृत्तिमाथि पनि उनले प्रश्न उठाए।
‘हिजोका सबै नेताहरू भ्रष्टाचारी थिए भन्ने भाष्य निर्माण गर्ने कुरा पनि बन्द गरे हुन्छ,’ पाण्डेले भने।
उनले रास्वपाका उपसभापति तथा अर्थमन्त्री डा. स्वर्णिम वाग्लेको उदाहरण दिँदै कांग्रेसमा रहँदा राष्ट्रिय योजना आयोगको उपाध्यक्ष बनेका उनी त्यतिबेला खराब र रास्वपामा प्रवेश गरेपछि असल कसरी भए भन्ने प्रश्न गरे। पुराना दलका नेता तथा कार्यकर्तामध्ये कतिपय अहिले रास्वपाबाट मन्त्री र सांसद बनेको उल्लेख गर्दै उनले विगतको राजनीतिक भूमिकालाई आधार बनाएर सबैलाई एउटै दृष्टिले हेर्न नहुने बताए।
पाण्डेले विगत ३५ वर्षमा सडक पूर्वाधार, शिक्षा, स्वास्थ्य, खानेपानी र विद्युत्लगायतका क्षेत्रमा भएका विकासलाई बेवास्ता गर्न नहुने पनि बताए। मुलुकमा केही पनि भएन भन्ने भाष्य निर्माण गर्दा विगतमा भएका उपलब्धिलाई बिर्सन नहुने उनको भनाइ थियो।
