ललितपुर। जनैपूर्णिमाको अवसरमा ललितपुरको पाटनस्थित ऐतिहासिक कुम्भेश्वर मन्दिरमा बिहीबार विशेष मेला लागेको छ। बिहानैदेखि कुम्भेश्वर महादेवको दर्शन र कुण्डमा स्नान गर्न भक्तजनको घुइँचो लागेको छ।
काठमाडौं उपत्यकाका विभिन्न स्थान तथा आसपासका क्षेत्रबाट ठूलो संख्यामा दर्शनार्थी मन्दिर पुगेका छन्। पौराणिक मान्यताअनुसार रसुवाको गोसाइँकुण्ड जान नसक्नेले कुम्भेश्वरको कुण्डमा स्नान गरे गोसाइँकुण्ड गएसरह पुण्य प्राप्त हुने जनविश्वास छ।
जनैपूर्णिमाका दिन नयाँ जनै फेर्ने तथा रक्षाबन्धन बाँध्ने परम्पराअनुसार मन्दिर परिसरमा ब्राह्मणबाट रक्षाबन्धन ग्रहण गर्नेको पनि बाक्लो उपस्थिति छ।
दर्शनार्थीको सहजताका लागि स्थानीय प्रशासन तथा विभिन्न संघसंस्थाका स्वयंसेवक परिचालन गरिएको छ। बिहानैदेखि बढेको भक्तजनको चहलपहल दिनभर रहने देखिएको छ।
