काठमाडौँ । सार्वजनिक खरिद अनुगमन कार्यालयले सञ्चालन गर्दै आएको विद्युतीय खरिद प्रणाली (ई-जीपी प्रणाली) मा अत्यधिक प्रयोगकर्ता चापका कारण प्राविधिक समस्या देखिएपछि विभिन्न खरिद प्रक्रियाको समयसीमा थप गरिएको छ।
कार्यालयका अनुसार २०८३ जेठ १८ गतेदेखि प्रणालीमा असामान्य रूपमा प्रयोगकर्ता संख्या बढ्दा सेवामा पहुँचसम्बन्धी समस्या उत्पन्न भएको थियो। सोही कारण विद्युतीय खरिद प्रणाली सञ्चालन निर्देशिका, २०८० को व्यवस्था बमोजिम यसअघि जेठ २० र २१ गतेसम्मका लागि म्याद थप गरिएको थियो।
तर प्रणालीमा निरन्तर उच्च चाप कायम रहँदा थप प्राविधिक जटिलता देखिएपछि म्याद समाप्त हुन बाँकी रहेका सम्पूर्ण बोलपत्र, आशय पत्र तथा सिलबन्दी दरभाउ पत्रको समयसीमा पुनः समायोजन गरिएको सार्वजनिक खरिद अनुगमन कार्यालयले जनाएको छ।
कार्यालयको २०८३ जेठ २० गतेको निर्णयअनुसार जेठ २० गते समाप्त हुने म्याद भएका खरिद प्रक्रियाहरूको अन्तिम समय जेठ २१ गते दिउँसो १२ बजेसम्म कायम गरिएको छ। यस्ता प्रस्तावहरू खोल्ने कार्य भने सोही दिन दिउँसो १ बजे गरिनेछ।
त्यस्तै, जेठ २१ गते म्याद समाप्त हुने बोलपत्र, आशय पत्र तथा सिलबन्दी दरभाउ पत्रहरूको समयसीमा जेठ २२ गते दिउँसो १२ बजेसम्म कायम गरिएको छ। ती प्रस्तावहरू जेठ २२ गते नै दिउँसो १ बजे खोलिने व्यवस्था मिलाइएको कार्यालयले जनाएको छ।
प्रणालीमा देखिएको प्राविधिक समस्याका कारण सेवाग्राही तथा सार्वजनिक निकायहरूलाई पर्न गएको असुविधालाई ध्यानमा राख्दै समयसीमा पुनः निर्धारण गरिएको कार्यालयको सूचनामा उल्लेख छ। सम्बन्धित निकाय तथा बोलपत्रदाताहरूलाई संशोधित तालिकाअनुसार आवश्यक प्रक्रिया पूरा गर्न आग्रह गरिएको छ।
