काठमाडौं– देशभर पछिल्लो २४ घण्टामा विभिन्न प्रकारका ४४ वटा विपद्का घटना भएका छन् । राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार ती घटनामा परी ३ जनाको मृत्यु भएको छ भने ११ जना घाइते भएका छन् ।
प्राधिकरणले सार्वजनिक गरेको दैनिक विपद् बुलेटिनअनुसार आगलागी, वन डढेलो, चट्याङ, बाढी, पहिरो, सर्पदंश तथा लेक लाग्ने घटनाहरू विभिन्न जिल्लामा भएका हुन् ।
सबैभन्दा बढी २२ वटा घटना हुरीबताससम्बन्धी रहेका छन् । हुरीबतासका घटनामा ३ जनाको मृत्यु भएको र ५ जना घाइते भएका छन् । यस्तै, आगलागीका ६, वन डढेलोका ७, चट्याङका १, बाढीका १, पहिरोका ३, सर्पदंशका ३ र लेक लाग्ने १ घटना भएका छन् ।
प्राधिकरणका अनुसार घटनाबाट ११ जना घाइते भएका छन् भने ११ वटा चौपायाको पनि क्षति भएको छ । विपद्का घटनाबाट करिब २५ लाख १६ हजार रुपैयाँ बराबरको अनुमानित आर्थिक क्षति भएको जनाइएको छ ।
बुलेटिनअनुसार हालसम्म ४८७ जना सुरक्षाकर्मी परिचालन गरिएको छ । सडक अवरोधको कुनै घटना भने नभएको प्राधिकरणले जनाएको छ ।
