काठमाडौँ । प्रतिनिधि सभामा जारी राजनीतिक तनावकाबीच प्रधानमन्त्री वालेन्द्र शाहले संसद्मा उपस्थित भई सांसदहरूको प्रश्नको जवाफ दिने विषयमा उपयुक्त समय पर्खिने बताएका छन्।
सभामुख डोलप्रसाद अर्यालले प्रतिनिधि सभा कार्यव्यवस्था परामर्श समितिको बैठकमा जानकारी गराए अनुसार प्रधानमन्त्री शाहले तत्काल होइन, अनुकूल परिस्थितिमा संसद्मा उपस्थित हुने संकेत गरेका हुन्।
संसदमा विपक्षी दलहरूले प्रधानमन्त्रीको उपस्थिति सुनिश्चित गर्न माग गर्दै निरन्तर दबाब बढाएपछि सदनको कार्यसूची प्रभावित बनेको छ। यही अवस्थाबीच विपक्षी दलहरूको अवरोध र नाराबाजीका कारण प्रतिनिधिसभा बैठक पटक-पटक प्रभावित हुँदै आएको छ।
सभामुख अर्यालले प्रधानमन्त्रीसँग सिंहदरबारमा भएको भेटमा प्रधानमन्त्रीले ‘उपयुक्त समय आएपछि संसद्मा उपस्थित भएर जवाफ दिने’ धारणा राखेको जानकारी समितिका सदस्यहरूलाई दिएका थिए।
यसैबीच, संसद् बैठकमा विपक्षीको अवरोध जारी रहँदा पनि कार्यसूची अघि बढाइएको थियो। सोही क्रममा अर्थमन्त्री स्वर्णिम वाग्लेले वैकल्पिक विकास वित्त परिचालन विधेयकमाथि दफावार छलफल अघि बढाउने प्रस्ताव प्रस्तुत गरेका थिए। संशोधनहरू निर्णायार्थ पेस भएपछि विधेयक पारित प्रक्रिया सम्पन्न भएको हो।
अवरोधकै बीच प्रतिनिधि सभाले अन्य विधेयकहरूमाथि विचार गर्ने प्रस्तावसमेत स्वीकृत गरेको छ। जसअनुसार निर्वाचनसम्बन्धी कानुन संशोधन, मतदाता नामावली अद्यावधिक प्रक्रिया तथा राष्ट्रिय विधि विज्ञान प्रयोगशालासम्बन्धी विधेयक अघि बढाउने सहमति बनेको हो।
लगातारको नाराबाजीका कारण संसदीय वातावरण असहज बने पनि बैठकको अर्को कार्यसूची आगामी वैशाख १२ गतेका लागि निर्धारण गरिएको छ।
