काठमाडौँ । काठमाडौँ महानगरपालिकाले मनसुनजन्य विपद् व्यवस्थापनलाई प्रभावकारी बनाउन गरिएको जोखिम मूल्यांकन (हजार्ड म्यापिङ) मार्फत महानगरभित्रका ७४ स्थानलाई उच्च जोखिमयुक्त क्षेत्रका रूपमा पहिचान गरेको छ ।
मनसुन अवधिमा सम्भावित विपद् न्यूनीकरण तथा पूर्वतयारीलाई सुदृढ बनाउने उद्देश्यसहित सुरक्षा निकाय र विभिन्न सरोकारवाला संस्थाको सहभागितामा क्षमता विकास तालिम तथा कृत्रिम अभ्यास (सिमुलेसन) कार्यक्रम सम्पन्न गरिएको महानगरले जनाएको छ ।
कार्यवाहक प्रमुख सुनिता डंगोलले शहरीकरणको तीव्र विस्तार र अत्यधिक ढलानका कारण ‘अर्बन फ्लड’ जस्ता जोखिम बढ्दै गएको उल्लेख गर्दै जनधनको क्षति न्यूनीकरणका लागि यस्ता अभ्यास आवश्यक रहेको बताइन् ।
महानगरले पहिचान गरेका जोखिमयुक्त ७४ स्थानमा समुदाय केन्द्रित सचेतना तथा पूर्वतयारी कार्यक्रम सञ्चालन गरिने योजना रहेको पनि उनले जानकारी दिइन् ।
उक्त अभ्यासमा नेपाल प्रहरी, सशस्त्र प्रहरी बल, नेपाल, नेपाली सेना, नेपाल रेडक्रस सोसाइटी, नेपाल स्काउट तथा विद्यार्थीहरूको सहभागिता रहेको थियो ।
तालिमले विपद् परिस्थितिमा अग्रपंक्तिमा खटिने ‘फर्स्ट रेस्पोन्डर’ को क्षमता अभिवृद्धि गर्ने अपेक्षा गरिएको महानगरले जनाएको छ ।
कार्यवाहक प्रमुख डंगोलले विपद् व्यवस्थापनमा प्रविधि र नवप्रवर्तनको उपयोग महत्वपूर्ण हुने उल्लेख गर्दै पुल्चोक इन्जिनियरिङ क्याम्पस (आईओई) ले प्रस्तुत गरेको प्रविधिको प्रशंसा गरेकी छन् ।
उनले उद्धार तथा राहत कार्यमा सुरक्षा निकाय र स्थानीय समुदायबीच निरन्तर समन्वय आवश्यक रहेको भन्दै सम्भावित जोखिम न्यूनीकरणमा सहकार्यलाई प्राथमिकता दिनुपर्ने बताइन् ।
सिमुलेसन अभ्यासमा विपद्को समयमा अपनाउनुपर्ने सावधानी तथा उद्धार प्रक्रियासम्बन्धी विभिन्न व्यावहारिक अभ्याससमेत गरिएको महानगरले जनाएको छ ।
