काठमाडौँ । पूर्वाधार विकास मन्त्री सुनिल लम्सालले नागढुंगा-मुग्लिङ सडक खण्डको स्थलगत निरीक्षण गरेका छन् । निर्माण कार्यमा देखिएको ढिलाइ तथा विभिन्न अवरोधबारे प्रत्यक्ष जानकारी लिन उनी आयोजनास्थल पुगेका हुन् ।
मन्त्रालयका अनुसार पछिल्लो समय सडक निर्माणको गति प्रभावित हुनुका कारणबारे वास्तविक अवस्था बुझ्न अनुगमन गरिएको हो ।
पश्चिम एसियामा विकसित भइरहेको द्वन्द्वका कारण बिटुमिन तथा पेट्रोलियमजन्य सामग्रीको आयात प्रभावित हुँदा सडक निर्माणमा असर परेको बताइएको छ । त्यसको प्रभाव नागढुंगा-मुग्लिङ सडक खण्डसहित देशका अन्य सडक आयोजनाहरूमा पनि देखिएको सम्बन्धित निकायको भनाइ छ ।
बिटुमिन र इन्धन अभावले कतिपय आयोजनाको काम सुस्त बनेको तथा केही स्थानमा निर्माण कार्य नै अवरुद्ध भएको अवस्था रहेको जनाइएको छ ।
त्यसैगरी स्थानीय तहमा देखिने अवरोध, ढुंगा, गिटी र बालुवाजस्ता निर्माण सामग्रीको सहज आपूर्ति हुन नसक्नु पनि परियोजना प्रभावित हुनुका कारणका रूपमा उल्लेख गरिएको छ ।
निर्माण व्यवसायीहरूले यस्ता समस्याबारे पटक-पटक सरकारको ध्यानाकर्षण गराउँदै आए पनि पर्याप्त सम्बोधन नभएको गुनासो गर्दै आएका थिए ।
यही पृष्ठभूमिमा आयोजना कार्यान्वयनमा देखिएका समस्या समाधानका उपाय खोज्न मन्त्री लम्सालले प्रत्यक्ष अनुगमनलाई प्राथमिकता दिएको मन्त्रालय स्रोतले जनाएको छ ।
