
काठमाडौँ, २१ असोज । पाँच महिनाअघि श्रीमतीको हत्या गरी फरार व्यक्ति पक्राउ परेका छन् ।
नुवाकोट दुप्चेश्वर गाउँपालिका-७ घर भएका जितबहादुर भन्ने काले तामाङ श्रीमतीको हत्या अभियोगमा भक्तपुरबाट पक्राउ परेका हुन् ।
गत वैशाख १९ गते दक्षिणकाली नगरपालिका-६ बस्ने ४५ बर्सिया डोल्मा शेर्पा डेरामा मृत फेला परेकी थिइन् । घटनाबारे अनुसन्धान गर्दा शेर्पालाई उनकै पति जितबहादुरले कुटपिट गरी हत्या गरेको खुल्न आएको काठमाडौँ उपत्यका अपराध अनुसन्धान कार्यालयका प्रवक्ता प्रहरी उपरीक्षक (एसपी) अंगुर जिसीले बताए ।
घटनापछि फरार रहेका जितबहादुरलाई हिजो कार्यालयको टोलीले भक्तपुर-१० छालिङबाट पक्राउ गरेर आज सार्वजनिक गरेको हो ।
एसपी जिसीका अनुसार उनी उपत्यकाका विभिन्न ठाउँमा लुकीछिपी बस्दै आएका थिए ।
जितबहादुरलाई आवश्यक अनुसन्धान तथा कानुनी कारबाहीको लागी प्रहरी वृत्त कीर्तिपुर पठाइएको छ ।