रौतहट, २५ श्रावण । सादा पोसाकको प्रहरी हुँ भन्दै रकम असुली गर्ने एक व्यक्तिलाई रौतहट प्रहरीले नियन्त्रणमा लिएको छ ।
नेपाल प्रहरीको सादा पोसाकको प्रहरी हुँ भन्दै सर्वसाधरणहरुसँग रकम असुल गर्न खोज्नुका साथै बिभिन्न व्यक्तिहरुको जिउ खानतलासी समेत गर्दै गरेको छ भन्ने बिशेष सूचनाको आधारमा उनलाई पक्राउ गरिएको हो ।
पक्राउ पर्नेमा रौतहट माधवनारायण नगरपालिका-१ बस्ने २४ वर्षको रमेश साह रहेको जिल्ला प्रहरी कार्यालय रौतहटका प्रवक्ता डिएसपी एलिजा गिरीले बताइन् ।
ईलाका प्रहरी कार्यालय चन्द्रनिगाहपुरबाट खटिएको टोलीले साहलाई मंगलबार राती चन्द्रपुर नगरपालिका-९ डुमरिया चोकबाट पक्राउ गरेको हो ।
पक्राउ परेका साहले बोकेको झोलाबाट तयारी हालतमा रहेको सशस्त्र प्रहरी बलको पोशाक समेत बरामद भएको डिएसपी गिरीले बताइन् ।
उनीउपर अभद्र व्यवहार मुद्दा शिर्षकमा जिल्ला प्रशासन कार्यालय रौतहट गौरबाट म्याद थप अनुमती लिई थप अनुसन्धान कार्य भईरहेको प्रहरीले जनाएको छ।
