काठमाडौं, २८ भाद्र । नेपाल प्रहरीले २५६ जना प्रहरी सहायक निरीक्षक (असई) र ६४ जना प्रहरी निरीक्षक (इन्स्पेक्टर) का लागि आवेदन माग गरेको छ ।
शुक्रवार गोरखापत्र दैनिकमा सूचना प्रकाशन गर्दै प्रहरीले ठुलो सङ्ख्यामा इन्स्पेक्टर र असईमा भर्नाका लागि आवेदन मागेको हो ।
योग्य उम्मेदवारले भदौ ३० गते देखि असोज ३० गतेभित्र आवेदन दिन सक्ने नेपाल प्रहरी भर्ना छनौट शाखाले जनाएको छ ।
प्रहरी निरीक्षकका लागि स्नातक तह पास गरी २० वर्ष उमेर पुगी २५ वर्ष ननाघेको हुनु पर्ने छ भने सहायक निरीक्षकका लागि भने प्रमाणपत्र तह पास गरी १८ वर्ष पुरा भई २४ वर्ष ननाघेको हुनु पर्ने छ ।
प्रहरी निरीक्षकमा ३५ जना खुला, अमर/अशक्त प्रहरी परिवारबाट एकजना, महिला ६ जना, आदिवासी जनजाती ९ जना, मधेसी ८ जना, दलित ४ जना र पिक्षडिएको क्षेत्रबाट एकजना गरी ६४ जनाको आवेदन माग गरिएको हो ।
त्यस्तै प्रहरी सहायक निरीक्षकमा १३८ जना खुला, अमर/अशक्त प्रहरी परिवारबाट ५ जना, महिला २३ जना, आदिवासी जनजाती ३६ जना, मधेसी ३१ जना, दलित १७ जना र पिक्षडिएको क्षेत्रबाट ६ जना गरी २५६ जनाको आवेदन माग गरिएको हो ।
योग्यता पुगेका नेपाली नागरिकले अनलाइनबाट आवेदन दिन सक्नेछन् ।
