दाङ, ६ भाद्र । आज बिहान घोराही-१६ महेन्द्र बहुमुखी क्याम्पस गेट नजिक शङ्कास्पद बस्तु फ्याँकेर भाग्ने दुई युवकलाई प्रहरीले नियन्त्रणमा लिएको छ ।
बिहीबार (आज) बिहान ९:०० बजेको समयमा रा ८ प ३३२३ नम्बरको मोटरसाइकलमा आएका व्यक्तिहरूले जुटको बोरामा बेरेर शङ्कास्पद वस्तु फालेर भागेका थिए ।
उनीहरूले फालेको शङ्कास्पद बस्तु केही समयपछि विस्फोट समेत भएको थियो ।
मोटरसाइकलमा पछाडि सवार सुभम कार्की लाई भागिरहेको अवस्थामा घटनास्थलमा नजिकैबाट नियन्त्रणमा लिएको दाङ प्रहरी प्रवक्ता डिएसपी राम प्रसाद तिमल्सिनाले बताए ।
मोटरसाइकलमा चालक अभियान थापालाई भरतपुर क्याम्पस रोडबाट पैदल भागिरहेको अवस्थामा नियन्त्रणमा लिइएको छ ।
दुवैउपर मुलुकी अपराध संहिता,२०७४ को परिछेद-७ अन्तरगत विस्फोटक पदार्थ सम्बन्धी कसुरमा दाङ जिल्ला अदालतबाट म्याद थप गर्ने तयारी भइरहेको डिएसपी तिमल्सिनाले बताए।
पक्राउ परेका दुवै युवकको घर घोराही-१५ मा रहेको बताइएको छ ।
