सिमकोट । हुम्लाको दक्षिणी भेगमा रहेको अदानचुली गाउँपालिकाका १६५ जना सुत्केरीले प्रोत्साहन भत्ता नपाएको गुनासो गरेका छन् ।
आर्थिक वर्ष २०७८/७९ मा प्रोत्साहनबापत पाउने भत्ता नपाएको उनीहरुको भनाइ छ । गाउँपालिकाले स्वास्थ्यचौकीलाई सुत्केरीले पाउने प्रोत्साहन भत्ता निकासा नदिएपछि ठूलो संख्यामा सुत्केरी महिला उक्त सुविधाबाट वञ्चित भएका हुन् ।
अदानचुली गाउँपालिका-१ की तारा महताराले आफू सुत्केरी भएको दुई वर्ष पुग्नै लाग्दासमेत सुत्केरीले राज्यबाट पाउने भत्ता नपाएको गुनासो गरिन्। पटक-पटक स्वास्थ्य चौकीमा उक्त भत्ता माग्न जाँदा निकासा नआएको जवाफ पाउने गरेको बताउँदै सुत्केरी महिलाहरूले अब त माग्नसमेत छोडेको जनाएका छन् ।
सुत्केरीले चार पटक गर्भ जाँच गरेको चार सयका दरले एक हजार छ सय र प्रसूतिगृहमा सुत्केरी भएबापत रु तीन हजार प्रोत्साहन भत्ता गरी रु चार हजार ६ सय हालसम्म पाउन सकेका छैनन् । भत्ता श्रीनगर स्वास्थ्य चौकीबाट प्रसूति गृहबाट घर फर्कने बेला पाउनुपर्ने भए पनि हालसम्म पाउन नसकेको उनीहरुको भनाइ छ ।
श्रीनगर स्वास्थ्य चौकीका अनमी सुस्मिता फडेराले सबै सुत्केरीले पाउनुपर्ने भत्ता रु सात लाख ५९ हजार छ । आफूहरूले भत्ता निकासाका लागि पटक-पटक गाउँपालिकालाई जानकारी गराए पनि निकासा नभएको उनको भनाइ छ ।
गाउँपालिकाका निमित्त प्रमुख प्रशासकीय अधिकृत मेघनाथ शाहीले आफू साउनमा मात्रै आएका कारण त्यस सम्बन्धमा कुनै जानकारी नभएको बताए।