दमक । झापाको दमक नगरपालिका-९ नम्बर वडा कार्यालयले विपन्न बालबालिकालाई लक्षित गरी निःशुल्क ट्यूसन कक्षा सञ्चालन गरेको छ ।
वडा कार्यालयले विपन्न समुदायका बालबालिकालाई ट्यूसन कक्षाको व्यवस्था गरेको हो । वडाले पहिलो चरणमा उराव बस्तीमा नि:शुल्क ट्यूसन कक्षा सञ्चालन गरेको छ । यहाँका अधिकांश बासिन्दा स्थानीय चिया बगानमा काम गर्छन् । विपन्न समुदायका बालबालिकालाई लक्षित गरी अतिरिक्त ट्यूसन कक्षा सञ्चालन गरिँदै आइएको वडाअध्यक्ष कुवेर भट्टराईले बताए ।
यहाँका विद्यार्थी स्थानीय महालक्ष्मी आधारभूत र पाणीनी माध्यमिक विद्यालयमा अध्ययनरत् छन् । सामुदायिक विद्यालयमा नियमित पठनपाठनका अतिरिक्त कमजोर विद्यार्थीका लागि नि:शुल्क ट्यूसन कक्षा सञ्चालन गरिएको हो । ट्यूसनका लागि वडाले कार्यक्रममा नै बजेट समावेश गरेको वडाध्यक्ष भट्टराईको भनाइ छ ।
“विद्यार्थीलाई पढाइमा अब्बल बनाउन यस किसिमको कार्यक्रम सुरु गरिएको हो, यसबाट बालबालिकाको शिक्षामा सुधार आएको छ”, उनले भने । दैनिक ज्यालदारी गरेर जीविकोपार्जन गर्दै आएका स्थानीयले छोराछोरीलाई अतिरिक्त शुल्क तिरेर पढाउने अवस्था छैन । दैनिक ज्यालाले गर्जो टार्ने हुँदा अधिकांश विद्यार्थी शिक्षाबाट वञ्चित छन् ।
“शिक्षाको गुणस्तर वृद्धि गर्ने प्रयास गरेका छौं, यसलाई निरन्तरता दिन्छौं”, वडाध्यक्ष भट्टराईले भने । वडाले यसका लागि रू ७५ हजार बजेट छुट्याएको छ । वडाको दिपज्योति उराव बस्तीमा सञ्चालित ट्यूसन कक्षामा कक्षा १ देखि ६ सम्मका ४३ तथा कक्षा ७ देखि १० सम्मका ३० बालबालिका सहभागी हुँदै आएका छन् ।
