छात्राहरूको दाबी: माइती नेपालले घटनालाई ढाकछोप गर्‍यो

अहिले हामीले आन्दोलन गरेपछि मात्र यो घटना बाहिर आएको हो । हामी अन्यायमा परेका छौ भनेर पटक पटक विद्यालय व्यवस्थापन समिति, नगरपालिका, माइती नेपाल तथा विश्वास नेपालमा पनि निवेदन दिएका हौँ । कहाँ उजुरी गर्नुपर्छ भन्ने कुरा पनि हामीलाई थाहा नभएको अवस्थामा हामीले यी संस्थाहरूलाई गुहारेका हौँ ।

यो विषयमा पटक पटक छलफल भए । शिक्षकलाई अव देखि सुध्रिन मौका दियौँ । माइती नेपाल तथा विश्वास नेपालको टोली विद्यालयमा आएर मिलेर अगाडि बढ्नुपर्छ । यस्तो घटना बाहिर निकाल्नु हुँदैन भनेर ढाकछोप गरेर जानुभएको हो ।

तर केटिएम दैनिकले विश्वास नेपाललाई सम्पर्क गर्दा सो संस्थाले आफूहरू यसअगाडि त्यहाँ नपुगेको बतायो । उक्त संस्थाको अध्यक्ष तारा भण्डारीले आफूहरू यसअगाडि त्यहाँ नपुगेको र घटनाको बारेमा सञ्चामाध्यमबाट मात्रै थाहा पाएको बताइन् । उनले अहिले पीडित भनिएका छात्राहरूलाई मनोसामाजिक परामर्श दिने तयारी भइरहेको समेत बताइन् ।

शिक्षकहरूले हामीलाई विश्वास गर्नुभएन

यो कुरा विद्यालयमा पनि पटक पटक उठेको हो । तर, अन्य शिक्षकहरूले हाम्रो कुरामा कहिल्यै पनि विश्वास गर्नुभएन । उल्टै हामीलाई अनेक थरी आक्षेप लगाउनु भयो । जुन कुरा हामी कल्पना पनि गर्न सक्दैनौँ । शिक्षिकाहरूले माइती नेपालसँग हाम्रा विद्यार्थीहरू गतिला छैनन् । यिनीहरू रत्नपार्क तथा बसपार्कको पुलमा भेटिन्छन् भनेर कुरा लगाउनु भएछ । जुन कुरामा कुनै सत्यता छैन । शिक्षा लिन विद्यालयका आएका विद्यार्थीहरूलाई यहाँसम्मको आक्षेप लगाउन कसरी सक्नुभयो होला । हामी अचम्मित बनेका छौँ ।

मङ्सिर १९ गते प्रहरीमा पर्‍यो उजुरी

काठमाडौँ जिल्लाको टोखा नगरपालिका-१०मा रहेकी श्री मनोहर माध्यमिक विद्यालयको प्रधानाध्यापकले सोही विद्यालयमा अध्ययनरत छात्रामाथि यौन दुर्व्यवहार गरेको भन्दै मङ्सिर १९ गते प्रहरीमा जाहेरी परेको छ ।

छात्राको अभिभावकले प्रहरी वृत्त, महाराजगञ्जमा सोमबार सोही विद्यालयका प्रधानाध्यापक माधव प्रसाद भट्टराईविरुद्ध किटानी जाहेरी दिएको र उक्त जाहेरी दर्ता भएको प्रहरी वृत्त महाराजगञ्जमा कार्यरत डिएसपी अंगुर जिसीले केटिएम दैनिकलाई बताए ।

जाहेरीमा प्रधानाध्यापक भट्टराईले छात्रालाई गत भदौदेखि नै विद्यालय समयमा र सो भन्दा पनि पहिले पटक पटक बोलाउने कोही अन्य विद्यार्थी भए छिटो छिटो बाहिर पठाउने र निज बालिकालाई कहिले ढोका लगाएर, कहिले खुल्लै अवस्थामा निज बालिकाको ढाड छुने, मुसार्ने, ब्रा को लक खोलिदिने गरेको उल्लेख छ ।

साथै उनले छात्रालाई, तिमीले यौन सम्पर्कको अनुभव तथा मज्जा लिएकी छौँ की छैनौ, तिम्रो त यौन सम्पर्क गर्ने उमेर हो भन्दै यौन सम्पर्क प्रति आकर्षित गर्ने जस्ता जघन्य क्रियाकलाप गर्दै आएको उल्लेख गरिएको छ ।

उनले ती छात्रालाई प्रधानाध्यापकको कार्यकक्षमा बोलाइ करणी गर्ने मनसायले ढाड सुमसुम्याउने, ब्रा को लक खोलिदिने जस्ता क्रियाकलाप गरी बाल यौन दुरुपयोग गरेको हुनाले हदैसम्मको कारबाहीको माग गर्दै जाहेरी दर्ता भएको हो ।

राष्ट्रिय शिक्षक सङ्गठनले निकाल्यो विज्ञप्ति

नेपाल राष्ट्रिय शिक्षक सङ्गठन जिल्ला समिति, काठमाडौँले आज एक विज्ञप्ति जारी गर्दै विद्यालयका शिक्षकहरू माथि अनावश्यक लाञ्छनाहरू लगाउने, विद्यालय संस्थामा बाधा पुऱ्याउने जस्ता कार्यहरू भइरहेको गम्भीर ध्यानाकर्षण भएको जनाएको छ ।

काठमाडौँ जिल्ला समिति अध्यक्ष डिल्ली प्रसाद शर्मा ढकालले जारी गरेको विज्ञप्तिमा शिक्षकहरू माथि श्रृङखलावद्ध रूपमा लगाइएका अनावश्यक लाञ्छना र आक्रमण तुरुन्त बन्द गर्न मा गरिएको छ ।

साथै विज्ञप्तिमा कहीँ कतैबाट गल्ती र कमजोरी भएका स-प्रमाण भएमा दोषी उपर कानुन सम्मत कार्यवाही हुनु पर्ने कुरामा आफूहरू दृढ रहेको समेत जनाइएको छ ।

प्रहरी भन्छ पक्राउ पूर्जी जारी भइसक्यो

प्रहरी वृत्त महाराजगञ्जका प्रमुख डिएसपी अंगुर जिसीले विद्यालयका प्रधानाध्यापक माधव प्रसाद भट्टराईविरुद्ध जिल्ला अदालत काठमाडौंबाट पक्राउ पूर्जी जारी भइसकेको बताए ।

यो समाचार तयार पार्ने क्रममा केटिएम दैनिकले जिसीसँग सम्पर्क गर्दा उनले मुद्दा दर्ता भएर अदालतबाट पक्राउ पूर्जी लिइसकेकाले अब केही दिन भित्रमा पक्राउ पर्ने बताए । उनले भने, “उहाँ सरकारी कर्मचारी हो कति नै दिन लुक्नुहुन्छ होला र । एक न एक दिन पक्राउ पर्नुहुन्छ ।”

सोही विद्यालयमा अध्ययनरत अन्य चार/पाँच जना छात्राहरूले पनि हामीमाथि प्रधानाध्यापकबाटै सोही प्रकृतिको दुर्व्यवहारमा परेको भन्दै निवेदन दिएको बुझिएको छ । प्रहरीले ती छात्राहरूबाट प्राप्त भएको निवेदनलाई समेत मुद्दामा समावेश गरेको जनाएको छ ।

प्रहरीको तथ्याङ्क भन्छ विगत पाँच वर्षमा ८६ छात्राहरू शिक्षकबाट बलात्कृत भए

विगत पाँच आर्थिक वर्षमा ८६ जना छात्राहरू शिक्षकबाटै जबरजस्ती करणीमा परेको तथ्याङ्क नेपाल प्रहरीसँग छ । आर्थिक वर्ष ०७४/७५ देखि ०७८/७९ मा सम्ममा सात प्रदेश र काठमाडौँ उपत्यकाका तीन जिल्लामा गरी ८६ जना छात्राहरू आफू शिक्षकबाट करणीमा परेको भन्दै उजुरी दिएका छन् ।

एक आर्थिक वर्षमा १० देखि १५ वटा उजुरी आउने भएता पनि आ.व ०७६/७७ मा भने ४५ वटा उजुरी आएको प्रहरीको तथ्याङ्कले देखाउँछ ।

यो पाँच वर्षको अवधिमा प्रदेश नम्बर १ मा पाँच वटा, मधेस प्रदेशमा आठ वटा, काठमाडौँ उपत्यकाका तीन जिल्ला बाहेक बागमती प्रदेशमा १५ वटा, गण्डकी प्रदेशमा १८ वटा, लुम्बिनी प्रदेशमा चार वटा, कर्णाली प्रदेशमा १५ वटा, सुदूरपश्चिम प्रदेशमा पाँच वटा र काठमाडौँ उपत्यकाका तीन जिल्लामा १६ वटा उजुरी परेको प्रहरीको तथ्याङ्कमा उल्लेख छ ।

Disclaimer : यो सामाग्री मनोहरा माध्यमिक विद्यालयमा अध्ययनरत पीडित भनिएका छात्राहरू, प्रहरी वृत महाराजगञ्जमा मंसिर १९ गते परेको उजुरी, सोही वृतका प्रमुख अंगुर जिसी, बाल अधिकारका लागि राष्ट्रिय अभियानका संयोजक प्रविन सिलवाल, सदस्य सोनी भट्टराई, विश्वास नेपालको अध्यक्ष तारा भण्डारी र विद्यालयका छात्राहरुको अभिभावकसँग गरिएको कुराकानीमा आधारित हो ।