जाजरकोटमा आइतबार दिउँसो जीप दुर्घटना हुँदा ११ जनाको मृत्यु भएको छ ।
कर्णाली प्रदेश २००१ च ०४२९ नम्बरको जीप छेडागाड नगरपालिका वडा नम्बर ३ जेवाबाट ४ को जेवातर्फ जाँदै गर्दा दशेराको बीचमा पर्ने भिरमा खस्दा ११ जनाको मृत्यु भएको हो ।
घटनास्थलमै रहेका नगरप्रमुख रत्न बहादुर खडकाले केटिएम दैनिकलाई दिएको जानकारी अनुसार निधन हुनेमा छेडागाड नगरपालिका-५ का दीपक अधिकारी, अमर अधिकारी, निषा अधिकारी, नैनसरा अधिकारी, देवीसरा बुढा, जैकुवरा बुढा, रामबहादुर बुढा, रहेका छन् भने वडा नम्बर ६ का वीर बहादुर खत्री, दैलेखको भगवती-२ का अमर खड्का, मान बहादुर रावत र बिरेन्द्र केसीको हुन् ।
तीमध्ये निधन भएका अधिकारी १३ दिनभित्रको नातामा पर्ने व्यक्तिहरू हुन् । जीप चालक मान बहादुरको पनि निधन भएको नगरप्रमुख खड्काले बताए ।
छेडागाड-५ की जैभान अधिकारी गम्भिर घाइते भएका छन् । चार जना मात्र क्षमता भएको उक्त बोलेरो गाडीमा १२ जना सवार रहेका थिए ।