बझाङमा जीप दुर्घटना हुँदा छ जनाको घटनास्थलमै मृत्यु भएको छ । जिल्लाको मष्टा गाउँपालिका–४ को चिउरीमा बुधबार दिउँसो डुङ्ग्रीबाट मष्टातर्फ गइरहेको जीप दुर्घटना हुँदा ६ जनाको घटनास्थलमा मृत्यु भएको प्रहरीले पुष्टि गरेको छ ।
बझाङका प्रमुख प्रहरी नायब उपरीक्षक (डीएसपी) जागेश्वर भण्डारीले केटिएम दैनिकलाई दिएको जानकारी अनुसार छ जनाको शव भेटिएको हो । उनले भने, ‘छ जनाको शव निकालेका छौँ । घाइतेहरुलाई अस्पताल पठाइरहेका छौँ ।’
डीएसपी भण्डारीका अनुसार जीप टुक्राटुक्रा भएका कारण नम्बर प्लेट समेत भेटिएको छैन । अहिले घाइतेहरुको उद्दार गर्ने क्रम जारी छ । जिल्ला सदरमुकाम चैनपुरमा लाग्ने सिलदेवी मेला हेरेर घर फर्कदै गरेका १६ जना यात्रु बोकेको जीप दुर्घटना भएको हो ।
घटनास्थल जिल्ला सदरमुकामबाट ५-६ किलोमिटरको दुरीमा भएतापनि बीचमा नदी भएको कारण घाइतेलाई झोलुङ्गे पुलबाट सदरमुकाम ल्याइदै छ । चालक समेत घाइते भएको हुनाले जीपमा कति जना सवार थिए भन्ने एकिन विवरण आइसकेको छैन । जीपमा १५-१६ जना यात्रु भएको बताइएको छ ।
डिएसपी भण्डारीका अनुसार घाइतेहरूको अवस्था गम्भिर भएकाले मृतकको सङ्ख्या अझै बढ्न सक्ने देखिएको छ । जीप सडकबाट अन्दाजी दुईसय मिटर भिरमा खसेको हो । नेपाल प्रहरी, नेपाली सेना र स्थानीयबासीले घाइतेहरूको उद्दार गरिरहेका छन् ।