मोरङको लेटाङ–५, खेरुवा वरपरको क्षेत्रमा सोमबार बिहान ७ बजेदेखि अर्को आदेश जारी नहुन्जेल सम्मका लागि जिल्ला प्रशासन कार्यालय मोरङले कर्फ्यू लगाएको छ एक महिला प्रहरीको ज्यान जानेगरी भएको आइतबारको झडपपछि स्थिति तनावपूर्ण बनेकाले लेटाङमा कर्फ्यू आदेश जारी गरिएको प्रमुख जिल्ला अधिकारी काशीराज दाहालले जानकारी दिए ।
सोमबार आदेश जारी गर्दै उनले लेटाङको वडा ३ र ४ को पश्चिम एरिया गङ्गे चोक र कमलपुर क्षेत्र, ५ वडाको सबै क्षेत्र, उत्तरमा लेटाङको ६ नम्बर वडा कार्यालय क्षेत्र, पूर्वमा मोरंङे खोला क्षेत्र, पश्चिममा चिस्याङ खोला क्षेत्रमा कर्फ्यू लगाइएको जनाए ।
विद्यार्थीमाथि यौन दुर्व्यवहार गरेको अभियोग लागेका शिक्षकलाई पक्राउ गर्न आइतबार खटिएको प्रहरी टोलीमाथि नै आक्रमण भएको थियो । यौन दुर्व्यवहार आरोपी लेटाङ नगरपालिका– ५ को शिक्षा विकास माध्यमिक विद्यालयका शिक्षक मनोज पौडेललाई पक्राउ गर्न पुगेको प्रहरी टोलीमाथि आक्रमण भएको हुँदा प्रहरी जवान उर्मिला श्रेष्ठको मृत्यु भएको थियो ।
उक्त घटनामा करिब २८ जना घाइते भएका छन् । तीमध्ये केही सामान्य र केही गम्भीर घाइते रहेको प्रहरीको भनाइ छ । घाइतेको मोरङको विभिन्न अस्पालमा उपचार भइरहेको छ । विद्यालयभित्रै लुकेर बसेका आरोपित शिक्षक पौडेललाई भने प्रहरीले नियन्त्रणमा लिएको छ ।
