आज सुर्खेत र चितवनमा भएको दुर्घटनामा दुई जनाको निधन भएको छ भने पाँच जना घाइते भएका छन् ।
महानगरीय ट्राफिक प्रहरी महाशाखाले दिएको जानकारीअनुसार सुर्खेतको विरेन्द्रनगर नगरपालिका ११ मा आज टिपरको ठक्करबाट मोटरसाइकलमा सवार एक किशोरीको मृत्यु भएको छ भने एक किशोरी घाइते भएकी छिन् ।
३ जना सवार भे ७ प १७९९ नम्बरको मोटरसाइकललाई भे १ ख ३३०२ नम्बरको टिपरले आज बिहान पौने १२ बजे ठक्कर दिएको थियो । दुर्घटनामा गम्भिर घाइते भएकी मोटरसाइकलमा पछाडि सवार लेकवेशी नगरपालिका ५ बस्ने १७ वर्षिया लक्ष्मी पुलामीको उपचारको क्रममा कर्णाली प्रदेश अस्पतालमा मृत्यु भएको हो ।
घाइते १७ वर्षिया सन्दिपा पुलामीको सोही अस्पतालमा उपचार भइरहेको छ । दुबै सवारी साधन सहित टिपर चालकलाई प्रहरीले नियन्त्रणमा लिएको छ भने मोटरसाइकल चालक फरार रहेकाले खोजी भइरहेको छ ।
त्यस्तै चितवनको भरतपुर महानगरपालिका १ मा आज भएको सवारी दुर्घटनामा एक जनाको मृत्यु भएको छ, भने चार जना घाइते भएका छन् ।
आज बिहान सवा ९ बजे पुलचोकबाट पोखरा बसपार्क तर्फ जाँदै गरेको ना २ ह २८५४ नम्बरको अटोलाई विपरीत दिशाबाट आउँदै गरेको ना १ ज ६९४२ नम्बरको म्याजिकले ठक्कर दिएर पुनस् सोही म्याजिक गाडीले ना १ ज ५१ ३६ नम्बरको म्याजिकलाई ठक्कर दिएको थियो ।
मृत्यु हुनेमा अटोमा सवार झापाको दमक नगरपालिका ५ का ७६ वर्षीय सोम प्रसाद पोख्रेल रहेका छन् । गम्भीर घाइते भएका पोख्रेलको उपचारको क्रममा भरतपुर अस्पतालमा मृत्यु भएको हो । अटोमा सवार अन्य चार जना घाइतेलाई उपचारको लागि नयाँ मेडिकल कलेज भरतपुर पठाइएको छ ।
दुर्घटनामा संलग्न सबै सवारी साधन सहित म्याजिक चालक भने प्रहरीको नियन्त्रणमा रहेका छन् ।
