नेपालका साना किसान कृषि सहकारी संस्था लि. का सदस्यका युवा छोराछोरीहरूलाई प्रशिक्षार्थी कृषि अध्ययनका लागि इजरायल पठाउन नेपाल स्थित इजरायली राजदूतावासले सहयोग गर्ने प्रतिबद्धता जनाएको छ ।
साना किसान लघुवित्त वित्तीय संस्था लि.एंव नेपाल कृषि सहकारी केन्द्रीय सङ्घ लि.का अध्यक्ष खेम बहादुर पाठक, साना किसान विकास लघुवित्त वित्तीय संस्था लि.का प्रमुख कार्यकारी अधिकृत डा. शिवराम प्रसाद कोइराला सँगको भेटमा इजरायली राजदूत हानान गोडरले कोरोना भाइरस कोभिड १९ का कारण केही समय देखी रोकिएको कृषि प्रशिक्षार्थी पठाउन आफू प्रतिबद्ध रहेको बताएका हुन् ।
उनले नेपाली साना किसान सदस्यहरूको जीवन रूपान्तरणका लागि कृषि र पशुपालनमा आधारित प्रशिक्षार्थी नेपालबाट पठाउने कार्यले नेपालको आर्थिक सामाजिक रूपान्तरणमा खेलेको भूमिकाले आफूहरूलाई खुसी लागेको बताए । नेपालका ७५ भन्दा बढी जिल्लामा साना किसान सञ्जाल रहेको यस साना किसान अभियानसँग जोडिएर गाउँ तहका साना किसान सदस्यहरूलाई कृषि उत्पादनका लागि प्रविधिको सहयोग गर्न पाउँदा आफूहरूलाई खुसी लागेको बताए ।
नेपालबाट प्रशिक्षार्थीका रूपमा इजरायल गएर १० महिना कृषिको अभ्यास र अध्ययन गरेर फर्केका धेरै युवाहरू अहिले व्यवसायी बनिरहेका छन् । नेपालमै सम्भावनाको ढोका खोलिरहेका छन् ।
इजरायलमा प्रयोग भएको नविनतम प्रविधिलाई नेपालमा भित्राउन यस कार्यक्रम महत्त्वपूर्ण रहेको बताइन्छ ।
इजरायलबाट सिप सिकेर फर्केका धादिङको जीवनपुरका युद्ध न्यौपानेले अहिले वार्षिक एक करोड बरावरको तरकारी बिक्री गरिरहेका छन् । यसै गरी धादिङकै देवराज आचार्यले पनि उदाहरणीय तरकारी खेती गरिरहेका छन् । यसै गरी तनहुँको बाख्रा फार्म, रुपन्देहीको सृजना चौधरीले गरेको माछा पालन व्यवसाय, झापाका चन्द्र बस्नेतको कृषि कर्म लगायत यस्तै धेरै युवाहरूको कृषि तथा पशुपालनको कर्म हेर्न लायक रहेका छन् ।
नेपाल मामिला बारे राम्रो जानकारी राख्ने राजदूत हानान गोडर कै अग्रसरतामा नेपालका साना किसानका छोराछोरीहरूलाई १० महिने प्रशिक्षार्थी कामदारका रूपमा इजरायल पठाउने कार्यको थालनी भएको थियो ।