नेपाली कांग्रेसको जारी १४ औं महाधिवेशनमा नयाँ नेतृत्वका लागि ६ जनाले उम्मदेवारी दर्ता गराएपनि एकजनाले मनोनयन फिर्ता लिएपछि अहिले ५ जना चुनावी मैदानमा छन् ।
कांग्रेसमा युवा नेतृत्वको आवश्यकता भन्ने निकै चर्का कुरा गर्नेहरुले पनि कल्याण गुरुङको खासै चर्चा गरेका छैनन् । सभापतिका अन्य चार उम्मेदवार ६० वर्ष माथिका उमेर समूहका छन् । कांग्रेस निकट विद्यार्थी संगठन नेबिसंघका पूर्व महामन्त्रीसमेत रहेका महोत्तरीमा जन्मिएका गुरुङ् पछिल्लो समय पार्टीको केन्द्रीय सदस्य थिए ।
२०४५ सालबाट विद्यार्थी राजनीतिबाट सक्रिय भएका गुरुङ नेबिसंघको गोविन्द भट्टराई सभापति हुँदा केन्द्रीय सदस्य थिए भने विश्वप्रकाश शर्मा सभपाति हुँदा सहमहामन्त्री भएका थिए । काँग्रेस विभाजन हुँदा देउवा निकट नेविसंघको सभापति भएका उनी कांग्रेस एकीकृत भएपछि देउवालाई छाडेका थिए ।
तत्कालीन कांग्रेस सभापति सुशील कोइरालाले उनलाई केन्द्रीय समितिमा मनोनित गरेका थिए । शनिवार सभापति पदमा उम्मेदवारी दर्तापछि मिडियामा गुरुङको चर्चा भए पनि प्रतिनिधिहरु माझ कुनै चर्चा छैन ।
गत वर्ष फाल्गुनमा गुरुङ्ले बुटवलमा पत्रकारहरुसँगको कुराकानीमा आफूले १४ औं महाधिवेशनमा सभापति पदमा उम्मेदवारी दिने घोषणा गरेका थिए । तर उनको चर्चा खासै भएन ।
कांग्रेस नेता विमलेन्द्र निधिले पनि धेरै समयअघि नै सभापतिको उम्मेदवार घोषणा गरेका थिए । उनको चर्चा निकै भयो तर उनलाई न शेरबहादुर देउवाले पत्याए, न अरु कार्यकर्ताले नै । अन्ततः विमलेन्द्र निधि एक्लो भएर पनि सभापतिमा उम्मेदवारी दिएका छन् ।