एक महिनादेखि विद्यालय खुले पनि शिक्षक नआएका कारण पढाइ नभएको सुनसरीको कोसी गाउँपालिका–१ मा रहेको राष्ट्रिय माध्यमिक विद्यालयका विद्यार्थीहरू आन्दोलित भएका छन् । सोमबार बिहान उनीहरू विद्यालयमा तालाबन्दी गरेर चार घण्टा पूर्वपश्चिम राजमार्ग अवरुद्ध गर्दै प्रदर्शन गरेका थिए ।
आज बिहान ११ बजेदेखि ४ घण्टा राजमार्ग अवरुद्ध गरेका विद्याथीहरूले कोसी गाउँपालिकाको लौकहीमा सडक प्रदर्शनसमेत गरेका हुन् । त्यसबाहेक आन्दोलनकारी विद्यार्थीले कोसी गाउँपालिकामा समेत तालाबन्दी गरेका छन् ।
उनीहरूले परीक्षा आउन लाग्दा पढाइ नभएको, पर्याप्त शिक्षक नभएको र भएका शिक्षक पनि समयमा विद्यालय नआउने गरेका कारण आन्दोलन गर्न बाध्य भएको बताए ।
१० बजे आउनुपर्ने शिक्षक १२, १ बजे आउने कुनै दिन पनि पूरै पढाइ नहुनेजस्ता समस्याका कारण आफूहरू सडकमा आउनु परेको विद्यार्थीहरूले बताएका छन् ।
