सुनकोसी नदीमा र्याफ्टिङ गर्ने क्रममा एक जनाको मृत्यु भएको छ । सिन्धुपाल्चोकको चौतारा साँगाचोकगढी नगरपालिका- ९ डुम्रेस्थित सुनकोसी नदीमा खसेर दोलखा मेलुङ गाउँपालिका- ४ घर भएका २२ वर्षीय सजन खड्काको मृत्यु भएको जिल्ला प्रहरी कार्यालय सिन्धुपाल्चोकले जनाएको छ ।
आइतबार दिउँसो करिब १ बजे चौतारा साँगाचोकगढी नगरपालिका वडा नम्बर ९ डुम्रेस्थित सुनकोशी नदीमा खसेर एक जनाको मृत्यु भएको जिल्ला प्रहरी कार्यालयले जनाएको छ।
हाल काठमाडौं ठूलो भर्याङस्थित स्वयम्भू खाद्यान्न डिपोमा काम गर्ने खड्काको खोजी गर्ने क्रममा शव फेला पारिएको प्रहरी नायव उपरीक्षक दक्षकुमार बस्नेतले बताए ।
स्प्लस नेपाल एड्भेन्चर काठमाडौंबाट नदीमा र्याफ्टिङ गर्न १० जना गएका थिए । १० जनामध्ये र्याफ्टिङ गर्ने क्रममा एक जना बेपत्ता भएका थिए ।
वेपत्ताको प्रहरी र सशस्त्र प्रहरीले खोजी गर्ने क्रममा दिउँसो ३ बजे शव फेला परेको हो । खड्का खसेकै ठाउँमा पानीभित्र उनको शव फेला परेको प्रहरीले जनाएको छ।