दार्चुला जिल्लाको दुहूँ गाउँपालिकामा बाढी पहिरोमा परी एक जनाको ज्यान गएको छ भने अन्य दुई जना बेपत्ता भएका छन् ।
गएरातीको पहिरोमा परि दुहूँ गाउँपालिका वडा नम्बर १ बस्पालीका नरसिंह महराको मृत्यु भएको हो भने उनकी श्रीमती कौशीदेबी महरा बेपत्ता भएका छन् । दुबैजना श्रीमान श्रीमती मात्रै बसेको अवस्थामा घर पहिरोले पुरिएपछि महरा दम्पत्ती बेपत्ता भएका हुन ।
पहिरोमा पुरिएर बेपत्ता भएका नरसिंह महरा भने फेला परिसकेको आफन्त आनसिंह महराले जानकारी दिए । बेपत्ता कौशीदेबी महराको खोजी भइरहेको छ । त्यस्तै पहिरोले घर पुरिंदा दुहूँ गाउँपालिका वडा नम्बर ५ दुल्लाका मनुवा डडाल बेपत्ता भएका छन् भने उनकी श्रीमती उजेली डडाल र छिमेकी जनकराम पार्की घाइते भएको स्थानीय लोकेन्द्र बमले जानकारी दिए ।
दुहूँ गाउँपालिकामा बाढी पहिरोले तीन वटा घरमा पूर्ण क्षति भएको छ भने एक दर्जन बढी घरहरुमा आंशिक क्षति भएको छ । खोलाहरुमा रहेका तीन वटा झोलुंगे पुल र एउटा आरसिसि पुल पनि बगाउँदा आवागमनमा समस्या भएको छ । वडा नम्बर ५ मा रहेको कालागाड जलविद्युत् योजनामा पनि क्षति पुर्याएको छ । उद्वारका लागि घटनास्थलसम्म पुग्न समेत समस्या भइरहेको छ ।
त्यस्तै दुहूँ गाउँपालिका वडा नम्बर ३ मा निजाङ खोलाको मोटरेबल पुल बगाएको छ । दार्चुला–तिंकर सडक खण्डको निजाङ खोलाको मोटर पुल बगाएको हो। बाढीले श्रीबगड नजिकै २ वटा घरमा पूर्ण क्षेति भएको र ३ ओटा घरमा क्षति भएको छ । जिल्लाभरीका नदी नालाहरुमा पानीको सतह बढेको छ ।
बाढी पहिरोले क्षति पुर्याएको क्षेत्रमा उद्धारका लागि सुरक्षाकर्मीको टोली गएको जिल्ला प्रहरी कार्यालय दार्चुलाका प्रहरी निरीक्षक ध्रुब बहादुर बिष्टले जानकारी दिए । श्रीबडर क्षेत्रमा भने डिएसपी मनोहर प्रसादको नेतृत्वमा सुरक्षाकर्मीको टोली परिचालित भएको छ ।