त्रिभुवन विश्वविद्यालयमा परीक्षा दिने विद्यार्थीहरुले आफ्नो प्रवेश पत्रको आधारमा कोरोना विरुद्धको खोप लगाउन पाउने भएका छन् ।
नेपाल विद्यार्थी संघ, अखिल क्रान्तिकारी, अनेरास्ववियू, समाजवादी युनियन र अखिल छैठौंले श्रावण २५ गते स्वास्थ्य राज्यमन्त्री उमेश श्रेष्ठलाई भेटेर विद्यार्थीहरुलाई खोप दिने व्यवस्था मिलाउन माग गरेका थिए ।
अहिले सचिवस्तरीय निर्णय गरेर विद्यार्थीलाई खोप लगाउन दिने निर्णय भएको नेविसंघका महामन्त्री दीपक भट्टराईले केटिएम दैनिकलाई बताए ।
स्वास्थ्य सेवा विभागको बाल कल्याण तथा खोप महाशाखाका प्रमुख डा. झलक शर्मा गौतमका अनुसार त्रिविद्वारा सञ्चालित परीक्षामा सहभागी विद्यार्थीहरुलाई तत्काल खोप दिने निर्णय भएको हो । खोप लगाउने विद्यार्थीले अनिवार्य रुपमा प्रवेश पत्र साथमा लैजानु पर्ने डा. गौतमले बताए । परीक्षा दिने लगभग ६० हजार विद्यार्थीले खोप लगाउन पाउने भएका छन् ।
उनका अनुसार काठमाडौंको प्रहरी अस्पताल, सैनिक अस्पताल, सशस्त्र प्रहरी अस्पताल र राधास्वामी आइसोलेसन खोप केन्द्रमा गएर विद्यार्थीले खोप लगाउन पाउनेछन् । त्रिविले अहिले स्नातक र स्नातकोत्तर तहको परीक्षा सञ्चालन गरिरहेको छ ।
