अहिले त्रिभुवन विश्व विद्यालयले भौतिक उपस्थिति सहित परीक्षा सञ्चालन गरेको छ । विद्यार्थीहरूलाई खोप नलगाएर परीक्षा लिन थालेको हो । अहिले त्रिविका स्नातक, स्नातकोत्तर तहको प्रवेश परीक्षा र परीक्षा सञ्चालन भइरहेको हो ।
एउटै हलमा त्रिबिले जारी गरेको जनस्वास्थ्य मापदण्डका विषय समेटिएको निर्देशिका विपरीत परीक्षा भइरहेको पीडित परीक्षार्थीको गुनासो छ । यस सन्दर्भमा पूर्व स्वास्थ्य मन्त्री गगन थापा सहितका नेताले प्रधानमन्त्री शेरबहादुर देउवालाई ध्यानाकर्षण गराएका छन् ।
नेपाली काँग्रेसका नेता थापाले भने,‘एउटै हलमा धेरै विद्यार्थी राख्दा हुने सङ्क्रमणको जोखिम त छ नै सङ्क्रमितलाई समेत छुट्टै व्यवस्था नहुँदा उनीहरू आफ्नो अवस्था लुकाइ परीक्षा दिन बाध्य छन् ।’ उनले स्वास्थ्य सुरक्षा मापदण्ड पालना गराउन वा वैकल्पिक माध्यमबाट परीक्षा चलाउन आग्रह गरे ।
उनले भने, ‘विद्यार्थीको भविष्य र स्वास्थ्यमाथि खेलबाड गर्नुहुँदैन । यस बारेमा हिजो साँझ प्रधानमन्त्रीज्यू लाई भेटेरै ध्यानाकर्षण गराएको छु । उहाँले यो विषयलाई गम्भीरताका साथ लिनुभएको छ र तत्काल पहलकदमी लिई ठोस निर्णय लिने कुराको विश्वास दिलाउनु भएको छ ।’