पोखरा महानगरपालिका–२१ कृस्ती ठुलाचौरकी १६ वर्षीय भगवती खत्रीलाई मुखमा ट्युमर पलाएपछि उपचार नै हुँदैन कि भन्ने चिन्ता थियो । जन्मजातै नाकमा सानो फोको आएको र पछि विस्तारै बढ्दै गएर मुखसहित अनुहार नै छोपिन थालेसँगै उनलाई जटिल समस्या परेको हो ।
ट्युमरले एकाएक अनुहार नै छोप्न थालेपछि भगवतीसँगै खत्री परिवार ठूलै समस्यामा परेको थियो । निम्नवर्र्गीय परिवारमा देखिएको सो समस्या उपचार नै नपाइने डरले थप चिन्तित बनेको अवस्थामा सामाजिक सेवामा समर्पित लायन्स क्लब अफ पोखरा चौतारी सहयोगीका रूपमा आएपछि यतिखेर खत्री परिवारमा खुसियाली छाएको छ ।
भगवतीको लायन्सको सहयोगमा अहिले उपचार भइरहेको छ । भगवतीको साँखुस्थित सुष्मा कोइराला मेमोरियल अस्पतालमा आज शल्यक्रिया हुने तयारी भइरहेको उनका बुबा गङ्गाबहादुर खत्रीले बताए । “छोरीको उपचारको कुराले हामी निकै चिन्तित थियौँ, लायन्स क्लब अफ पोखरा चौतारीले सहयोग गरेपछि उपचार हुने भएको छ”, उनले भने ।
भविष्य निर्माण माविमा विद्यार्थीका लागि शैक्षिक सामग्री सहयोग गर्न पुगेको लायन्स क्लबको टोलीले विद्यार्थी भगवतीको चिन्ताजनक अवस्था देखेपछि उपचार गरिदिने वातावरण तयार गरेको हो ।
“मुखमा बढेको ट्युमरका कारण खाने कुरा खानभन्दा पनि पानी पिउन असाध्यै अप्ठेरो हुने गरेको थियो”, भगवतीले भनिन्, “पहिलो पटक २०७७ वैशाखमा सुष्मा कोइराला मेमोरियल अस्पताल शल्यक्रिया गरेपछि केही सहज भएको थियो पछि पुनः बढ्दै गएको छ ।”
पोखरा–२१ स्थित भविष्य निर्माण माविमा कक्षा १० मा अध्ययनरत उनले भनिन्, “भाग्यले अप्ठेरो पारे पनि परिवारको सहयोग तथा विद्यालयमा सर र साथीको माया एवं उत्साहले अध्ययनलाई निरन्तरता दिन सके अहिले त उपचार पनि हुने भयो ।”
लायन्स क्लबको समन्वयमा अस्पतालले सबै उपचार निःशुल्क गरिरहेको छ । यो सहयोग लायन्सका सदस्यबाट सङ्कलन गरिएको हो । उपचारको अन्य सम्पूर्ण खर्च पनि साथीहरुबाट सहयोग जुटाएर नै गरिने छ । डाक्टरका अनुसार भगवतीको ट्युमरको तीन पटक शल्यक्रिया गर्नुपर्छ ।
कृषिकार्य गरी जीविकोपार्जन गर्दै आएको भगवतीको परिवारमा बुबा वडा कार्यालयका कार्यालय सहयोगीका रूपमा काम गर्दै आएका छन् भने आमा राधा घरयसी काममा नै व्यस्त हुन्छिन् । एउटा दिदी र भाइसमेत रहेकी भगवतीका लागि उपचार असहज भएका अवस्थामा लायन्सबाट गरिएको सहयोग अतुलनीय भएको परिवारको भनाइ छ ।