मोरङको विराटनगरमा आमाको शव आफ्नै परम्पराअनुसार अन्त्येष्टि गर्ने विषयमा दुई छोरोबीच विवाद उत्पन्न भएको छ । विराटनगरस्थित विराटनगर अस्पताल (विराट नर्सिङ होम) मा मृत्यु भएकी एक महिलाको शव अन्त्येष्टिको विषयमा उनका दुई छोराबीच विवाद उत्पन्न भएको हो ।
बिहीबार बिहान मृत्यु भएकी सिराहाको सिराहा नगरपालिका–२ हकपाराकी ७२ वर्षीया सुमित्रा यादवको शव अन्त्येष्टिको विषयमा उनका छोराबीच कुरा नमिलेको हो । जेठ ९ गते घरमा खाटबाट लडेर दाहिने खुट्टा भाँचिएपछि भर्ना भएकी सुमित्राको बिहीबार बिहान ५ बजे उपचारको क्रममा मृत्यु भएको थियो ।
मृतक सुमित्राका एक पति तथा दुई छोरा छन् । दुई छोरामध्ये जेठो छोरो बा–आमासँग बस्दै आएका छन् भने कान्छो छोरो विदेशमा छन् । सुमित्राका पति सूर्यनाथ यादव (गोप) परम्पराकालदेखि हिन्दू धर्म मान्छन् । जेठो छोरा लक्ष्मीप्रसाद भने इसाई धर्म मान्दै आएका थिए ।
लक्ष्मीले आमाको अन्त्येष्टि ईसाई धर्मअनुसार गर्ने योजना बनाएका थिए । जसका लागि उनले पाँच हजार रुपैयाँ हालेर काठको कफन किनेर अस्पातल ल्याएका थिए । तर, कान्छा छोराकै निर्देशनमा पति सूर्यनाथ भने हिन्दू संस्कारअनुसार नै सुमित्राको अन्त्येष्टि गर्ने योजना बनाएका थिए ।
सोही विषयमा विवाद उत्पन्न हुँदा निकै समय अन्त्येष्टि गर्नुपर्ने शव दुवै पक्षले लिन पाएनन् । त्यसपछि अस्पताल प्रशासन, स्थानीय बुद्धिजीवीले पत्नीको शवको हक पतिमा हुने भनेपछि लास सूर्यनाथले लिएर गएका थिए ।
यता, लक्ष्मीले भने आफ्नी आमाको शव ईसाई संस्कारअनुसार अन्त्येष्टि गर्न नपाएको दुखेसो पोखेका छन् ।
