१ नम्बर प्रदेशसभा सदस्य बिन्दिया कार्कीका छोरा रोविन सिंह कार्की पक्राउ परेका छन् । एक मजदुरको ज्यान जानेगरी विराटनगरमा बिहीबार साँझ भएको सवारी दुर्घटना प्रकरणमा जिल्ला प्रहरी कार्यालय मोरङको प्रहरी टोलीले आइतबार उनलाई पक्राउ गरेको हो ।
गत बिहीबार बेलुका २४ वर्षीय रोविनले चलाएको प्रदेश ३–०१–००२ च २१३९ नम्बरको कारले विराटनगर–४ एयरपोर्ट सडकखण्डअन्तर्गत नहर चोकमा दुई मजदुरलाई ठक्कर दिएको थियो । बेलुका करिब ७ः३५ बजे भएको सो दुर्घटनाबाट भारत कटिहार घर भएका ३५ वर्षीय मुकेश शर्माको मृत्यु भएको थियो ।
उनी विराटनगर–४ मा रहेको न्यू एभरेस्ट फर्निचरमा काम गर्ने मजदुर हुन् । घटनामा उनकै साथी कटहरी गाउँपालिका–२ का २७ वर्षीय रामकुमार राजवंशी गम्भीर घाइते बनेका थिए । उनको विराटनगरस्थित नोबेल मेडिकल शिक्षण अस्पतालमा उपचार भइरहेको छ ।
उद्योगबाट काम सकेर घर जाने क्रममा पैदल हिँडिरहेका मजदुरहरूलाई उनले चलाएको कार अनियन्त्रित भई ठक्कर दिएको थियो । एक जनाको उपचारका क्रममा मृत्यु भएको हो भने अर्का एक जना गम्भीर घाइते भएका थिए । दुर्घटनाबाट कार पनि क्षतिग्रस्त भएको थियो ।
सो दुर्घटनापछि फरार रहेका कार्कीलाई आज अपराह्न ४ बजे विराटनगर महानगरपालिका–२ भट्टा चौकबाट पक्राउ गरिएको जिल्ला प्रहरी कार्यालय मोरङका प्रहरी नायव उपरीक्षक मानबहादुर राईले जानकारी दिए । उनका अनुसार कार्कीमाथि सवारी ज्यान कसुरमा थप अनुसन्धान भइरहेको छ ।