विराटनगरमा बिहीबार साँझ भएको सवारी दुर्घटना प्रकरणमा दोषीलाई कारवाही गर्न मजदुर सङ्गठनले माग गरेका छन् । आइतबार विज्ञप्ति जारी गर्दै अखिल नेपाल ट्रेड युनियन महासङ्घ मोरङले उक्त घटनामा संलग्नलाई कारवाही गर्न र पीडितलाई क्षतिपूर्ति दिन माग गरेका हुन् ।
गत बिहीबार बेलुका रोविनले चलाएको प्रदेश ३–०१–००२ च २१३९ नम्बरको कारको ठक्करबाट भारत कटिहार घर भएका ३५ वर्षीय मुकेश शर्माको मृत्यु भएको थियो । उनी विराटनगर–४ मा रहेको न्यू एभरेस्ट फर्निचरमा काम गर्ने मजदुर हुन् ।
घटनामा उनकै साथी कटहरी गाउँपालिका–२ का २७ वर्षीय रामकुमार राजवंशी गम्भीर घाइते बनेका थिए । उनको विराटनगरस्थित नोबेल मेडिकल शिक्षण अस्पतालमा उपचार भइरहेको छ । बिहीबार साँझ साढे ७ बजे विराटनगर–४ एयरपोर्ट मोडमा उनले चलाएको कार अनियन्त्रित भई दुर्घटना भएको थियो । उद्योगबाट काम सकेर घर जाने क्रममा पैदल हिँडिरहेका मजदुरहरूलाई कारले ठक्कर दिएको थियो । ठक्करबाट कार पनि क्षतिग्रस्त भएको थियो ।
‘बिहीबार न्य एभरेष्ट स्टिल उद्योग प्रा.लि. कञ्चनबारी विराटनगरमा कार्यरत कामदारहरूको कार दुर्घटनाप्रति गम्भीर ध्यानाकर्षण भएको छ’, विज्ञप्तिमा लेखिएको छ, ‘मृतक मजदुरप्रति हार्दिक श्रद्धाञ्जली अर्पण गर्दै घाइतेको शीघ्र स्वास्थ्यलाभको कामनासहित मृतकको परिवारलाई उचित क्षतिपूर्ति र घाइतेको सम्पूर्ण उपचार खर्चसहित क्षतिपूर्तिको माग गर्दछ ।’
यस्तै उक्त घटनालाई मोरङ प्रहरीले ढाकछोप गर्न खोजेकोप्रति सङ्गठनले आपत्ति जनाएको छ । घटना घटाउने रोविनलाई यथाशिघ नियन्त्रणमा लिई स्वतन्त्र र निष्पक्ष अनुसन्धान गरी कानुनी कारवाही गर्न सङ्गठनले माग गरेको छ ।
यता, कार चालक रोविन कार्की नै भएको निष्कर्ष निकालेपनि प्रहरीले अझैसम्म रोविनलाई पक्राउ गर्न सकेको छैन । दुर्घटना हुँदाको समयमा कारमा सवार पाँच जनामध्ये चार जनाले दिएको बयानको आधारमा प्रहरीले कार रोविनले नै चलाएको निष्कर्ष निकालेको हो ।