धनगढी उप–महानगरपालिकाका नगर उप–प्रमुख तथा न्यायिक समितिका संयोजक सुशीला मिश्र भट्टले न्यायिक समितिले छातीमा हात राखेर न्याय दिन सक्नुपर्ने बताएकी छन् ।
आइतबार धनगढी उप–महानगरपालिकाको न्यायिक समितिले आयोजना गरेको न्यायिक समितिको काम कर्तव्य र अधिकार क्षेत्र, म्याद तामेल तथा कानुनी प्रक्रिया सम्बन्धी अन्तरक्रिया कार्यक्रममा बोल्दै उप–प्रमुख भट्टले यस्तो धारणा राखेकी हुन ।
धनगढी उप–महानगरपालिकाको न्यायिक समितिले न्याय पाउनुपर्ने व्यक्तिले न्याय महसुस गर्ने गरी काम गरिरहेको छ, नगर उप–प्रमुख भट्टले भनिन्, ‘न्याय देखिने कुरा पनि हो ।’ न्यायिक समितिले प्रभावकारी न्याय निरूपणका लागि सरोकारवालहरू सँग अन्तरक्रिया गरेको उप–प्रमुख भट्टले बत्ताइन । सबैको रचनात्मक सहयोग भएका न्यायिक समितिले गर्ने काम अझै प्रभावकारी हुँदै जाने छ, उप–प्रमुख भट्टले भनिन्, ‘अन्तरक्रिया कार्यक्रमले धेरै पुरा स्पष्ट पारेको छ ।’
अन्तरक्रिया कार्यक्रममा जिल्ला अदालत कैलालीका शाखा अधिकृत अनिरुद्ध साउदले सहजीकरण गरेका थिए । उनले धनगढी उप–महानगरपालिकाले न्याय सम्पादनमा उत्कृष्ट काम गरेको बताए । अन्तरक्रियामा वडा अध्यक्षहरू, वडा सचिवहरू, न्यायिक समिति सदस्यहरू र कर्मचारीहरूको सहभागिता रहेको थियो ।
