कोरोना बिमा गरेका व्यक्तिले नीजी प्रयोगशालामा परिक्षण गराउँदा पनि बीमा रकम पाउने भएका छन् ।
यसअगाडी बीमा समितिले नेपाल सरकार स्वास्थ्य मन्त्रालय अन्तर्गतका निकायबाट पिसिआर परिक्षण गर्दा कोरोना भाइरस (covid 19) रोग संक्रमण देखिएको प्रमाण पेश भएका सात दिनभित्र दावी भुक्तानी गर्नुपर्ने उल्लेख गरेको थियो ।
आज बीमा समितिले एक परिपत्र जारी गर्दै नेपाल सरकार स्वास्थ्य तथा जनसंख्या मन्त्रालयबाट कोभिड १९ परिक्षण गर्न स्वीकृत प्राप्त अस्पताल वा प्रयोगशालाबाट आएको नतिजाको आधारमा विमा दावी गर्न पाइने उल्लेख गरेको हो । बीमा समितिका कार्यकारी निर्देशक राजुरमण पौडेलका अनुसार बीमा रकम दाबी गर्न निजी र सरकारी प्रयोगशालामा कोरोना संक्रमण पुष्टि भएको सक्कल रिपोर्ट पेश गर्नुपर्नेछ।
बीमा दावी भुक्तानीको लागि थप कागजातहरु पेश गर्नुपर्ने भएको छ ।
बीमा समितिले जारी गरेको परिपत्र अनुसार पेश गर्नुपर्ने कागजातहरु यस्ता छन् ।
१ ) पूर्ण रुपमा भरिएको दावी फाराम
२) कोरोना संक्रमण पुष्टि भएको परिक्षणको सम्पूर्ण सक्कल कागजातपत्र तथा नेपाल सरकार स्वास्थ्य तथा जनसंख्या मन्त्रालयको अभिलेख, होम आइसोलेसनमा बसेकाको हकमा सम्वन्धित स्थानीय तहको सिफारिश,
३) अस्पताल भर्ना भएको अवस्थामा चिकित्सकको लिखित परामर्श बमोजिम गरिएको औषधोपचार तथा सम्वन्धित खर्चको बील भर्पाई
४) अस्पताल भर्ना भएको अवस्थामा भर्ना भएको र डिस्चार्ज भएको कागजाहरु तथा तोकिएको आइसोलेसन सेन्टरमा आइसोलेसनमा बसेको अवस्थामा सो लिखित प्रमाण
५) बीमा समितिबाट जारी कोरोना बीमा मापदण्ड, २०७७ मा उल्लेखित अन्य विवरण तथा कागजपत्रहरु
पुरै भुक्तानी नपाइने
बीमा समितिले जारी गरेको नयाँ मापदण्ड अनुसार संक्रमित भइ आइसोलेसनमा बस्नु परेमा राहत खर्च बापत बिमांकको २५ प्रतिशत मात्र भुक्तानी दिइनेछ । अर्थात १ लाख रुपैंयाको बीमा गरेको व्यक्ति कोरोना संक्रमित भइ घरमा होम आइसोलेसनमा बस्दा उसले बीमाबाट २५ हजार मात्र पाउनेछ ।
यदि उक्त व्यक्ति उपचारको लागि अस्पताल भर्ना हुनु परेमा वा आइसोलेसनमा बस्नु परेमा औषधोपचार खर्चमा लागेको रकम (बील अनुसार) बढीमा बिमांक रकमको ७५ प्रतिशत भुक्तानी पाउनेछ ।
यसरी शत प्रतिशत बिमा रकमलाई २५ देखि ७५ प्रतिशतसम्म झारिएको छ । यसअगाडी बीमा गरेको १५ दिनपछि मान्य हुने अवधिलाई बढाएर ३० दिन बनाइएको छ । अर्थात आज बिमा गरेको व्यक्ति ३० दिन भित्र कोरोना संक्रमित भएको अवस्था उक्त व्यक्तिले बीमा रकम दावी गर्न पाउने छैन ।