सामाजिक सञ्जाल फेसबुकमा महिलाले पुरुषहरुलाई ठगिरहेको बताइरहँदा एक पुरुषले महिला बनेर धेरै युवाहरुले ठगि गरेको खुलेको छ ।
प्रहरीका अनुसार कैलाली घर भई ललितपुरको महालक्ष्मी नगरपालिका, टिकाथली बस्दै आएका २७ वर्षीय धन बहादुर शाहीले गुगलबाट ‘आकर्षक’ महिलाको फोटो तानेर नयाँ फेसबुक आइडी बनाएका थिए।
त्यही आइडीबाट युवती हुँ भन्दै उनले युवकहरुलाई ठग्ने गरेको उजुरीपछि महानगरीय अपराध महाशाखाको टोलीले शाहीलाई कोटेश्वबाट बिहीबार पक्राउ गरेको छ ।
फेसबुकमा महिला बनेर पुरूषलाई ठगी गर्ने क्रममा एक पुरूषलाई माया जालमा पारी विभिन्न अश्लिल फोटोसमेत लिइसकेका थिए। त्यसरी उनले पीडितलाई आइएमईबाट पैसा पठाउन लगाएको महाशाखाले जनाएको छ।
पैसा नदिएमा आफन्तजन, साथीहरुलाई उक्त तस्विरपठाई बेईज्जत गरी दिन्छु भनी पटक-पटक ब्ल्याकमेलिङ गरेका थिए ।
ती व्यक्तिलाई शाहीले एक लाख ८५ हजार ठगिसकेको थियो भने थप एक लाख मागेको अवस्थामा उनलाई पक्राउ गरेको हो।
उनका अनुसार पटक/पटकसम्म त्यसरी गरेको भन्ने उजुरी दिएपछि प्रहरीले शाहीलाई पक्राउ गरेको हो। उनीमाथि थप अनुसन्धान गर्न महानगरीय प्रहरी परिसर, काठमाडौं पठाएको छ।
