काठमाडौं, १४ बैसाख । कोरोना संकटका बेला स्वास्थ्य सामग्रीमा कालोबजारी गरेका कारण पक्राउ परेका उद्योगी सुलभ अग्रवालविरुद्ध प्रहरीले तीन वर्ष कैदसहित चार मुद्दा चलाउन सिफारिस गरेको छ ।
अग्रवालविरुद्ध चार मुद्दामा तीन वर्ष कैद र १५ लाख ७८ हजार ९ सय १३ रुपैयाँ बिगो माग गरिएको काठमाडौं प्रहरी परिसरका एसपी सोमेन्द्रसिंह राठौरले जानकारी गराएका छन् ।
परिसरले कालोबजारी, अवैध भण्डारण, कृत्रिम अभाव सिर्जना र सार्वजनिक पदको दुरुपयोगमा मुद्दा चलाउन सिफारिस गरेको हो । अग्रवालविरुद्धको मुद्दामा अनुसन्धान सकेर सरकारी वकिलको कार्यालयमार्फत जिल्ला प्रशासन कार्यालयमा मुद्दा दर्ता गर्ने प्रहरीको तयारी छ ।
कालोबजारी ऐनको दफा २ (क) अनुसार सरकारले तोकेको मूल्यभन्दा बढी मूल्यलिई बिक्री गरेको पाइएमा एक वर्ष कैद अथवा १० हजार रुपैयाँ जरिवाना गर्ने व्यवस्था छ ।
२० प्रतिशतभन्दा बढी मुनाफा लिई बिक्री गरेको पाइएमा एक वर्ष कैद वा २ लाख ५० हजार रुपैयाँ जरिवाना र अभाव सिर्जना गरेर बढी मूल्यमा बेचेको खण्डमा एक वर्ष कैद वा २ लाख ५० हजार रुपैयाँ जरिवाना हुने व्यवस्था रहेको महानगरीय प्रहरी परिसरका मुद्दा शाखाका डीएसपी कृष्ण चन्दले बताएका छन् ।
अग्रवालविरुद्ध सार्वजनिक पदको दुरुपयोग गरेको मुद्दामा पनि कारबाही हुने जनाइएको छ । सार्वजनिक पद धारण गरेको व्यक्तिले पदको दुरुपयोग गरी गैरकानुनी काम गरेको पाइएमा थप डेढी सजाय हुने व्यवस्था फौजदारी कसुरमा व्यवस्था छ ।
अग्रवालले बिक्री–वितरण गरेका स्वास्थ्य सामग्री जफत गरी १५ लाख ७८ हजार ९१३ रुपैयाँ जरिवाना भराउनुपर्ने प्रहरीको सिफारिस छ ।
नेपालका लागि कीर्गिस्तानका अवैतनिक दूत समेत रहेका अग्रवालले कूटनीतिक सुविधाको गाडी दुरुपयोग गर्दै कालोबजारी गरिरहेका बेला चैत २५ गते ६७ थान थर्मल गनसहित पक्राउ परेका थिए । अग्रवाल चीनबाट २ हजार ४ सयमा खरिद गरेका थर्मल गन १५ हजार रुपैयाँमा बेचिरहेको अवस्थामा पक्राउ परेका थिए ।