काठमाडौँ । प्रधानमन्त्री केपी शर्मा ओली र पूर्वराष्ट्रपति विद्यादेवी भण्डारीबीच भेट भएको छ । मंगलबार साँझ प्रधानमन्त्रीको सरकारी निवास बालुवाटारमा प्रधानमन्त्री ओली र पूर्व राष्ट्रपति भण्डारीबीच भेटवार्ता भएको हो ।
एमालेको राजनीतिमा सक्रिय बन्ने तर्फ अग्रसर रहेकी पूर्व राष्ट्रपति भण्डारीले एमाले अध्यक्ष समेत रहेका ओलीसँग भेट गर्नुलाई अर्थपूर्ण रुपमा हेरिएको छ ।
एमालेका पादधिकारीहरुले पनि भण्डारीलाई पार्टीको सक्रिय राजनीतिमा ल्याउन प्रयास गरिरहेका छन् । पुर्व उपराष्ट्रपति नन्द बहादुर पुन माओवादीको उपाध्यक्ष बनेर भण्डारीलाई सक्रिय राजनीतिमा आउन बाटो खोलेको विश्लेषण गरिएको छ ।
भण्डारीले पछिल्ला दिनहरुमा देशका विभिन्न भागमा पुगेर एमालेका नेता, कार्यकर्ताहरूसँग भेट गर्ने गरेकी छन् । त्यस्तै उनले हालै एमाले नेताको हैसियतमा चीन भ्रमण समेत गरेकी थिइन् ।
पूर्व राष्ट्रपति भण्डारीले प्रधानमन्त्री ओलीसँग पछिल्लो राजनीतिबारे छलफल गरेको र अर्कोतर्फ भण्डारीले पार्टीमा आफ्नो भूमिका खोजेको विश्लेषण गरिएको छ ।
