काठमाडौँ– प्रमुख प्रतिपक्षी दल नेपाली कांग्रेसले इनम सापकोटा प्रकरणको सत्यतथ्य छानबिन गर्न संसदीय समिति गठनको माग उठाउन पार्टीको संसदीय दललाई निर्देशन दिएको छ।
सोमबार सिंहदरबारस्थित संसदीय दलको कार्यालयमा बसेको बैठकमा कांग्रेस महामन्त्री प्रदीप पौडेलले यस्तो निर्देशन दिएका हुन्।
अदालतमा बिचौलियाको भूमिका निर्वाह गरेको आरोपमा प्रहरी हिरासतमा रहेका इनम सापकोटा प्रकरणको निष्पक्ष छानबिन आवश्यक रहेको भन्दै पौडेलले संसदीय समितिको माग गर्न दललाई निर्देशन दिएका हुन्।
‘अदालतमा भइरहेको बिचौलिया प्रकरणको छानबिन गर्न संसदीय समिति माग गर्न दललाई पार्टीले निर्देशन दिएको छ,’ पौडेलले रातोपाटीसँग भने, ‘पार्टीको तर्फबाट दलको बैठकमा मैले त्यस्तो निर्देशन दिएको हुँ।’
त्यस्तै, महामन्त्री पौडेलले सञ्चारमाध्यममा पुगेर प्रहरीले पत्रकारलाई नियन्त्रणमा लिने तथा कर्मचारीलाई पक्राउ गरी प्रधानमन्त्री तथा मन्त्रिपरिषद्को कार्यालयमा पुर्याउने घटनाबारे पनि आवाज उठाउन निर्देशन दिएका छन्।
उनले यी विषयमा छलफल गर्न तत्काल संघीय संसद्को अधिवेशन आह्वान गर्न माग गर्नसमेत संसदीय दललाई निर्देशन दिएको जानकारी दिए।
