काठमाडौं। नेकपा एमालेका सचिव महेश बस्नेतले बढ्दो महँगीका कारण सर्वसाधारणलाई दसैँ, तिहार र छठजस्ता चाडपर्व मनाउनसमेत कठिन भएको बताएका छन्।
एमाले बागमती प्रदेश कमिटीले आयोजना गरेको कार्यक्रममा बस्नेतले खाद्य सामग्रीको मूल्य २०० प्रतिशतभन्दा बढी बढेको दाबी गर्दै महँगीले जनताको दैनिक जनजीवन अस्तव्यस्त बनाएको बताए।
गत वर्ष सहज रूपमा चाडपर्व मनाएका नागरिक यस वर्ष आर्थिक भारका कारण समस्यामा परेको उनको भनाइ थियो। ग्यासको अभावमा उपभोक्ता लाइन बस्नुपर्ने अवस्था रहेको उल्लेख गर्दै उनले सरकारको कार्यशैलीका कारण जनताले शान्ति सुरक्षा, विकास र समृद्धिभन्दा दैनिक समस्यालाई प्राथमिकतामा राख्नुपरेको दाबी गरे।
“यसपालि त्यो सहजताका साथ यो पर्व मनाउन सक्ने अवस्था छैन,” बस्नेतले भने।
उनले पछिल्लो समय नागरिकमा असुरक्षाको चिन्ता बढेको दाबी गर्दै सरकारले शान्ति सुरक्षा र जनजीविकाका सवाललाई प्राथमिकतामा राख्नुपर्ने बताए।
