काठमाडौं । नेपाली कांग्रेसको सभापतिमा गगनकुमार थापा निर्वाचित भएका छन्। पार्टीको १५औँ महाधिवेशनअन्तर्गत शुक्रबार असोज २३ गते भएको मतदानको मतगणना शनिबार बिहान सम्पन्न हुँदा थापा ६ हजार ५८४ मत प्राप्त गरी सभापतिमा निर्वाचित भएका हुन्।
निर्वाचन संयोजक प्रेमबहादुर खड्काका अनुसार सभापतिका अर्का उम्मेदवार श्यामकृष्ण खड्गीले ३७५ मत प्राप्त गरे। निर्वाचनमा कुल सात हजार १३ मत खसेकामा ५४ मत बदर भएको थियो।
विद्यार्थी राजनीतिबाट राष्ट्रिय नेतृत्वसम्मको यात्रा तय गरेका थापा झन्डै चार दशक लामो राजनीतिक अनुभवपछि कांग्रेसको नेतृत्वमा पुगेका हुन्। उनले २०४६ सालको जनआन्दोलनका क्रममा कक्षा ९ मा अध्ययन गर्दै गर्दा राजनीतिक यात्रा सुरु गरेका थिए। त्यसबेला उनी बालकांग्रेसका सदस्य थिए।
२०४८ सालमा नेपाल विद्यार्थी संघ (नेविसंघ) काठमाडौं वडा नम्बर ३३ को सचिव बनेका थापा २०५१ सालमा त्रिचन्द्र क्याम्पसको स्वतन्त्र विद्यार्थी युनियन (स्ववियु) सदस्य निर्वाचित भए। उनी २०५३ सालमा स्ववियु सचिव र २०५५ सालमा सभापति बनेका थिए।
२०५५ सालमै त्रिभुवन विश्वविद्यालयको सिनेट सदस्य बनेका थापा २०५७ सालमा नेविसंघको केन्द्रीय उपाध्यक्ष र २०५९ सालमा महामन्त्री निर्वाचित भए। विद्यार्थी राजनीतिमा सक्रिय रहँदै उनले २०६१ सालमा तत्कालीन राजाको प्रत्यक्ष शासनविरुद्ध भएको आन्दोलनमा अग्रणी भूमिका निर्वाह गरेका थिए। सोही क्रममा उनीमाथि राजद्रोहको मुद्दासमेत लगाइएको थियो। अन्तर्राष्ट्रिय मानव अधिकार संस्था एम्नेस्टी इन्टरनेसनलले उनलाई ‘आस्थाको बन्दी’ घोषणा गरेको थियो।
२०६२/६३ सालको जनआन्दोलनमा लोकतन्त्र र गणतन्त्रका पक्षमा सक्रिय भूमिका खेलेपछि थापा राष्ट्रिय राजनीतिमा थप चर्चित बने। २०६४ सालको संविधानसभा निर्वाचनमा समानुपातिक प्रणालीबाट सभासद् बनेका उनले संविधान निर्माण, मौलिक हक, बालअधिकार, नागरिकता र ऊर्जा सुरक्षालगायत विषयमा काम गरेका थिए।
२०७० सालमा काठमाडौं क्षेत्र नम्बर ४ बाट निर्वाचित भएपछि उनले संविधान निर्माण प्रक्रियामा योगदान पुर्‍याए। २०७१ सालमा कृषि तथा जलस्रोत समितिको सभापति बनेका थापाले कृषि, ऊर्जा र जलस्रोतसम्बन्धी नीतिगत बहसमा भूमिका निर्वाह गरेका थिए।
२०७३ सालमा स्वास्थ्यमन्त्री बनेका थापाले आफ्नो नौमहिने कार्यकालमा स्वास्थ्य सेवा सुधार, स्वास्थ्य बिमा र चिकित्सा शिक्षा सुधारलाई प्राथमिकता दिएका थिए। त्यसपछि २०७४ र २०७९ सालको प्रतिनिधिसभा निर्वाचनमा पनि काठमाडौं क्षेत्र नम्बर ४ बाट निर्वाचित हुँदै उनले शिक्षा, स्वास्थ्य, रोजगारी, वातावरण र सुशासनका विषय संसद्मा उठाउँदै आएका थिए।
कांग्रेसको १४औँ महाधिवेशनबाट २०७८ सालमा महामन्त्री निर्वाचित भएका थापा पार्टीभित्र नीतिगत बहस र संगठन सुधारका पक्षमा सक्रिय थिए। २०८२ साल भदौ २३ र २४ गतेको ‘जेनजी’ आन्दोलनपछि पार्टीमा युवा सहभागिता र संगठनात्मक सुधारको आवश्यकता औँल्याउँदै उनले अर्का महामन्त्री विश्वप्रकाश शर्मासँग मिलेर विशेष महाधिवेशन आह्वान गरेका थिए। उक्त विशेष महाधिवेशनबाट उनी पार्टी सभापतिमा सर्वसम्मत निर्वाचित भएका थिए।
विशेष महाधिवेशनबाट पार्टीको नेतृत्व सम्हालेका थापा नौ महिनापछि सम्पन्न १५औँ महाधिवेशनबाट पुनः सभापतिमा निर्वाचित भएका हुन्।
राजनीतिसँगै अध्यापन, सञ्चार र सामाजिक अभियानमा समेत संलग्न थापाले विद्यार्थी जीवनदेखि नै शिक्षा र सार्वजनिक सेवामा सुधारको वकालत गर्दै आएका छन्। युवालाई स्वदेशमै अवसर सिर्जना गर्ने, सार्वजनिक शिक्षामा लगानी बढाउने, स्वास्थ्य सेवामा समान पहुँच सुनिश्चित गर्ने र सुशासन कायम गर्ने विषय उनका राजनीतिक एजेन्डाका प्रमुख प्राथमिकता रहँदै आएका छन्।
विद्यार्थी राजनीतिबाट पार्टीको सर्वोच्च नेतृत्वसम्म पुगेका थापाको नेतृत्वलाई कांग्रेसको संगठनात्मक सुधार, नीतिगत रूपान्तरण र नयाँ पुस्ताको राजनीतिक सहभागिताका दृष्टिले महत्त्वपूर्ण रूपमा हेरिएको छ।